ކުޅުދުއްފުށީގައި ފުރަތަމަ ފަހަރަށް އީދު ނަމާދު ބޮޑު ޖަމާއަތެއްގައި ކޮށްފި

ކުޅުދުއްފުށީގައި ފުރަތަމަ ފަހަރަށް ބޮޑު ޖަމާއަތެއްގައި އަލްހާ އީދު ނަމާދު މިއަދު ކޮށްފި އެވެ.

ކުޅުދުއްފުށީ ސްޓޭޑިއަމްގައި ކުރި އީދު ނަމާދުގެ ބޮޑު ޖަމާއަތުގައި 1500 އެއްހާ މީހުން ބައިވެރިވެފައިވާ ކަމަށް އެކަން އިންތިޒާމް ކުރިފަރާތުން މައުލޫމާތު ދެއެވެ. މިޖަމާއަތުގައި އިމާމުވެ އީދު ނަމާދު ކޮށްދެއްވީ އދ. މަހިބަދޫ ގުލްޝަނީގެ ހަސަން ޞަބާޙެވެ.

އަންހެނުންނާއި ފިރިހެނުން އަދި ގިނަ އަދަދެއްގެ ކުޑަކުދިން ވަނީ މިބޮޑު ޖަމާއަތުގައި ބައިވެރިވެފަ އެވެ. ޒޯން ސްޓޭޑިއަމްގެ އިތުރުން ކުޅުދުއްފުށީގެ 2 މިސްކިތެއްގައި ވެސް ވަނީ މިއަދު އީދު ނަމާދު ކޮށްފަ އެވެ. އެގޮތުން ހުކުރު މިސްކިތުގައި އީދު ނަމާދު ކޮށްދެއްވީ ކުޅުދުއްފުށީ ޕެސާވަރު ނޫރުއްސަލާމް އަބޫބަކުރެވެ. އަދި ނޫރު މިސްކިތުގައި އިމާމުވެ ނަމާދު ކޮށްދެއްވީ ކުޅުދުއްފުށީ، ކާޕެންޓްރީގެ އަބޫބަކުރު ހަސަނެވެ.

ސްޓޭޑިއަމްގައި މިއަދު އީދު ނަމާދު ކުރެވުނު އިރު ފުލުހުން ވަނީ އެސަރަހައްދުގެ ޓްރެފިކް ބަލަހައްޓާފަ އެވެ. މިއީ ކުޅުދުއްފުށީގައި ހުސްބިމެއްގައި، ބޮޑު ޖަމާއަތެއްގައި ނަމާދު ކުރި ފުރަތަމަ ފަހަރެވެ.

މި ސަރަހައްދުގެ ބައެއް ރަށްރަށުގައި ވެސް ވަނީ ހުސްބިންތަކުގައި އީދު ނަމާދު ކޮށްފަ އެވެ. މާލޭގައި މިއަދު ހެނދުނު ސްޓޭޑިއަމް ސަރަހައްދުގައި ކުރުމަށް ހަމަޖެހިފައި އޮތް އީދު ނަމާދު، ވިއްސާރަ ވުމުގެ ސަބަބުން ވަނީ ކެންސަލް ކޮށްފަ އެވެ.