މިއަދު ބާއްވަން ހަމަޖެހިފައި އޮތް ރިޔާސީ އިންތިޚާބު ކެންސަލް ކޮށްފި

މިއަދު ބާއްވަން ހަމަޖެހިފައި އޮތް ރިޔާސީ އިންތިޚާބުގެ ފުރަތަމަ ބުރުގެ ވޯޓުލުން “ފުލުހުން ހުރަސްއެޅުމުގެ ސަބަބުން” ކެންސަލް ކޮށްފިއެވެ.

ވޯޓާ ގުޅޭ އެއްވެސް ލިއެކިއުމެއް ބޭރު ނުކުރެވޭނެ ކަމަށް “ފުލުހުން ބުނެ ހުރަސް އެޅުމުން” މިއަދު ރިޔާސީ އިންތިޚާބުގެ ވޯޓު ލުން ނުބާއްވަން ނިންމައިފި ކަމަށް އިލެކްޝަންސް ކޮމިޝަނުންވަނީ އިއުލާންކޮށްފައެވެ. އެގޮތަށް އިއުލާންކުރި އިރު ޖުމްހޫރީ ގުޅުމާއި ޕީޕީއެމުން ބުނެފައި ވަނީ މިއަދު އިންތިޚާބު ބޭއްވުމަކީ ޣައިރު ގާނޫނީ ކަމެއް ކަމަށް ކަމަށާއި އެކަން ގަބޫލުނުކުރާނެ ކަމަށެވެ.

މިއަދު ހެނދުނު ނޫސްވެރިންނަށް މައުލޫމާތު ދިނުމަށް އިލެކްޝަން ކޮމިޝަނުން ބޭއްވި ޕްރެސް ކޮންފަރެންސުގައި ފުއާދު ތައުފީގު ވިދާޅުވީ އިލެކްޝަންސް ކޮމިޝަނަށް މިނިވަންކަމާއެކު މަސައްކަތް ކުރެވެން ނެތް ކަމަށެވެ. އަދި މިއަދު ކަންތައްތައް ހިނގައިދިޔަ ގޮތުން، އިންތިހާބު ބޭއްވުމާއި ނުބޭއްވުމުގެ ބާރު ފުލުހުންގެ އަންމަތީގައިވާ ކަމަށާއި އަލުން އަނެއްކާވެސް އިންތިހާބެއް ބާއްވާނަމަ މަދުވެގެން ތިން ހަފްތާ ނުވަތަ 21 ދުވަސް ބޭނުންވާ ކަމަށް ވެސް އޭނާ ވިދާޅުވިއެވެ.

ސިއްހަތު ސަލާމަތުން ހުރިހާ ހިނދަކު އިސްތިއުފާ ނުދެއްވާނެ ކަމަށާއި އިންތިޚާބު އިތުރަށް ބޭއްވުމަށް ހިތްވަރު އިތުރަށް ގަދަވެފައިވާ ކަމަށްވެސް ފުއާދު ވިދާޅުވިއެވެ.