މިއަދު ހިނގާދިޔަ ކަންތައްތަކަކީ ރައްޔިތުންނަށް ކަށަވަރުކޮށްދީފައިވާ އަސާސީ ޙައްޤުތަކެއް ނިގުޅައިގަތުން: ރައްޔިތުންގެ މަޖިލިސް

މިއަދު  ހިނގާދިޔަ ކަންތައްތަކަކީ ދިވެހިރާއްޖޭގެ ޖުމްހޫރިއްޔާގެ އަސާސީން ރައްޔިތުންނަށް ކަށަވަރުކޮށްދީފައިވާ އަސާސީ ޙައްޤުތަކެއް ނިގުޅައިގަތުންކަމަށް ރައްޔިތުން މަޖިލީހުން ނެރުނު ނޫސް ބަޔާނެއްގައި ބުނެފިއެވެ.

މިއަދު ބާއްވަން ހަމަޖެހިފައި އޮތް ރިޔާސީ އިންތިޚާބު ކުރިއަށް ނުގެންދެވޭގޮތަށް ފުލުހުން ހުރަސްއަޅާފައިވުމުން، އެކަމާއި ގުޅިގެން ރައްޔިތުންގެ މަޖިލީހުން ނެރެފައިވާ ނޫސް ބަޔާނުގައި ބުނެފައިވަނީ 19 އޮކްޓޯބަރ 2013 ވީ ހޮނިހިރު ދުވަހު ހިނގާދިޔަ ކަންތައްތަކަކީ ދިވެހިރާއްޖޭގެ ޖުމްހޫރިއްޔާގެ އަސާސީން ރައްޔިތުންނަށް ކަށަވަރުކޮށްދީފައިވާ އަސާސީ ޙައްޤުތަކެއް ނިގުޅައިގަތުންކަމަށް ދެކޭ ކަމަށާއި  ޤާނޫނުއަސާސީއައީ ޤާނޫނުގައި ކަނޑައަޅައި ބަޔާންކޮށްފައިވާ އިމުން ބޭރުން މޯލްޑިވްސް ޕޮލިސް ސަރވިސްގެ ވެރިންގެ އަމުރަށް މިއަދު ފުލުހުން ޢަމަލުކޮށްފައިވާ ގޮތް ކުށްވެރިކުރާ ކަމަށެވެ.

ރައްޔިތުންގެ މަޖިލީހުގެ ރައީސް އަބްދުﷲ ޝާހިދު ގެ ނަމުގައި ނެރެފައިވާ މި ބަޔާނުގައި  ދެން އިންތިޚާބު އޮންނާނެ ތާރީޚެއް މި ހިނދުން މިހިނދަށްވެސް ކަނޑައަޅުއްވައި، އެކަން އިޢްލާންކުރައްވައި، ސީދާ ރައްޔިތުން އިންތިޚާބުކުރާ ރައީސަކު 11 ނޮވެމްބަރ 2013 ގައި ދިވެހިރާއްޖޭގެ ވެރިކަމާ ޙަވާލުވުމަށްޓަކައި އިލެކްޝަންސް ކޮމިޝަނުން އަދާކުރުމަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ޤާނޫނުން ޙަވާލުކޮށްފައިވާ މަސްއޫލިއްޔަތު އަދާކުރެއްވުމައިގެން ކުރިއަށް ވަޑައިގެންނެވުމަށް ވަނީ އިލެކްޝަންސް ކޮމިޝަނަށް ވަނީ ގޮވާލާފައެވެ.

ޤާނޫނުގައި ބަޔާންކޮށްފައިވާ މުއްދަތު ތެރޭގައި އިންތިޚާބުތަކުގެ ވޯޓު ނެގުމާއި އެ ވޯޓުގެ ނަތީޖާ އިޢްލާންކުރުމާއި، އިންތިޚާބުގައި ވޯޓުނެގުމަށް ކުރަންޖެހޭ ކަންތައްތައް ކުރުމާއި، އެ ކަންތައްތައް ހިންގުމާއި، ބެލެހެއްޓުމާއި، އެކަންތައްތަކަށް މަގުފަހިކުރުމާއި ކަށަވަރުކުރުމަކީ، ޤާނޫނުއަސާސީގެ 170 ވަނަ މާއްދާއިން އިލެކްޝަންސް ކޮމިޝަނާ ޙަވާލުކޮށްފައިވާ މަސްއޫލިއްޔަތެކެވެ.