ކުޅުދުއްފުށީ ކައުންސިލް އިދާރާގެ ކުރިމަތީގައި އެމްޑީޕީން ކުރި މުޒާހަރާ ނިންމާލައިފި

11:48

މާދަމާ ރޭ އަލުން މުޒާހަރާ ބާއްވާނެކަމަށް ބުނުމަށްފަހު މިރޭގެ މުޒާހަރާ ނިންމާލައިފި.

11:30

މުޒާހަރާގައި މި ވަގުތު ތިބީ މަދު އަދަދެއްގެ ބަޔަކު. މިރޭ 12 ގެ ފަހުން އަޑުގަދަ ބޭނުން ނުކުރާނެކަމަށް މުޒާހަރާގަ އިސްކޮށް އުޅޭ ފަރާތްތަކުން ބުނޭ.

10:20

މުޒާހަރާގެ ބައިވެރިން ބުނަމުންދަނީ އެ މީހުން ކުރަމުން އަންނަ އިހުތިޖާޖު ހުއްޓާލާނީ އިންތިހާބު ބާއްވާނެ ތާރީޚެއް ލިބުމުން ކަމަށާއި 1000 ފަހަރު އިންތިހާބު ބޭއްވިއަސް ރައީސް ނަޝީދު ނޫން މީހަކު ރައީސްކަމުގެ މަގާމަށް ނުހޮވޭނެ ކަމަށެވެ.

ކުޅުދުއްފުށީ ހޮސްޕިޓަލް ފިޔަވައި ދެންހުރި ސަރުކާރުގެ މުއައްސަސާތައް ބަންދުކޮށް ހުއްޓުވުމަކަށް ގެނައުމަށާއި ސަރުކާރަށް އެއްބާރުލުންދޭ މީހުންގެ ވިޔަފާރިތައް ބޮއިކޮޓްކުރުމަށް ވެސް މުޒާހަރާގެ ބައިވެރިން ދަނީ ގޮވަމުންނެވެ.

10:00

މިއަދު ބާއްވަން އޮތް ރިޔާސީ އިންތިހާބު ކެންސަލްކުރުމާ ގުޅިގެން އެމްޑީޕީގެ ކުޅުދުއްފުށީ މެމްބަރުން ކުޅުދުއްފުށީ ކައުންސިލް އިދާރާގެ ކުރިމަތީގައި މުޒާހަރާ ކުރަން ފަށައިފި އެވެ.

ފުލުހުން މިއަދުގެ އިންތިހާބަށް ހުރަސްއަޅާ އިންތިހާބު ހުއްޓުވާފައިވާތީ އެކަމާ ދެކޮޅު ހެދުމުގެ ގޮތުން މިރޭ އެމްޑީޕީން މުޒާހަރާ ފަށާފައިވަނީ ކުޅުދުއްފުށީ ހިއްކި ސަރަހައްދުގައެވެ. އޭގެ ފަހުން މުޒާހަރާގެ ބައިވެރިން ކުޅުދުއްފުށީގެ އެންމެ ބޮޑު މަގުކަމަށްވާ އަމީނީމަގުގަ ހުންނަ ކައުންސިލް އިދާރާގެ ކުރިމަތީގައި އިށީނދެ ތިބެ ޝުއޫރު ފާޅުކުރަން ފެށިއެވެ.

އެމްޑީޕީން ކުޅުދުއްފުށީގައި ކުރިއަށްގެންދާ އިހުތިޖާޖުގައި އަދި މިހާތަނަށް އެއްވެސް ހަމަނުޖެހުމެއް ހިނގާފައެއް ނުވެއެވެ. އަދި އެ ސަރަހައްދުގައި ފުލުހުންގެ ހަރަކާތެއް ފެންނަން ނެތްއިރު އިހުތިޖާޖުގައި ބައިވެރިވާ މީހުން ގިނަވަމުން އަންނަ ކަމަށް މައުލޫމާތު ލިބެއެވެ.

(އިތުރު ތަފްސީލް)