ބަރުދަނުގައި 286 ކިލޯ ހުރި އަންހެނަކު 13 މީހުންގެ އެހީތެރިކަމާއެކީ ހައްޖުގެ އަޅުކަން ފުރިހަމަކޮށްފި

ބަރުދަނުގައި 286 ކިލޯ ހުރި މިސްރުގެ އަންހެނަކު 13 މީހެއްގެ އެހީތެރިކަމާއެކު ހައްޖުގެ އަޅުކަން އަދާކޮށްފި އެވެ.

ސައުދީގެ ނޫހެއް ކަމަށްވާ ސައުދީ ގެޒެޓްގައި ބުނެފައިވާ ގޮތުގައި ހަމްދިއްޔާ ހަމްޒާ ނަމަކަށް ކިޔާ މިސްރުގެ މި އަންހެންމީހާ ހައްޖުގެ މަތިވެރި އަޅުކަން އަދާކޮށްފައިވަނީ ޠަވާފް އެސްޓަބްލިޝްމެންޓުގެ 13 ސްޓާފް މެމްބަރުންގެ އެހީގައެވެ. ހައްޖުގެ އަޅުކަން ފުރިހަމަ ކުރުމަށް ކެތްމަދުވެފައިހުރި ހަމްދިއްޔާއަށް މި ފުރުސަތު ތަނަވަސްކޮށްދީފައިވަނީ އޭނާގެ ފިރިހެން ދަރިފުޅާއި އޭނާގެ ދަނބިދަރިފުޅެވެ.

ޠަވާފް އެސްޓަބްލިޝްމެންޓްގެ ޗެއާމަން، ރިޒާ މުހައްމަދު ޖަމީލަށް، އާދަޔާ ޚިލާފަށް ބަރު މި އަންހެންމީހާގެ ޚަބަރު ފޯރުކޮށްދިނުމުން އެމީހާއަށް އެހީތެރިވުމަށް ޚާއްސަ ޚިދުމަތްތަކެއް ކުރިއަށްގެންދިޔައެވެ. މިގޮތުން އެމްބިއުލާންސް އެއްގައި ގޮސް ޖިއްދާގެ އަބްދުލްއަޒީޒް އިންޓަރނޭޝަނަލް އެއާޕޯޓުން އޭނާ އާއި ވަނީ ބައްދަލުކޮށްފައެވެ. އަދި އެހިސާބުން ފެށިގެން ޚާއްސަ ފްރޮޅުލީ ގޮނޑިއަކާއި މައްކާގައި ހަމްދިއްޔާއަށް ފަސޭހަ ކަމާއެކު ހުރެވޭނެ ގޮތް ވަނީ ހަމަޖައްސާދީފައެވެ. މިގޮތުން މިނާ އާއި އަރަފާތު އަދި މުޒްދަލިފާގައި ހަމްދިއްޔާއަށް ޚާއްސަ ޓެންޓްތަކެއް ވަނީ ޖަހައިދީފަ އެވެ.

ސައުދީގެ ގެޒެޓަށް މައުލޫމާތު ދެމުން ރިޒާ މުހައްމަދު ބުނެފައިވަނީ ހަމްދިއްޔާއަށް އެހީތެރިވުމަށް ހަމަޖެއްސި މުޠާވިފުން އޭނާ ބޮޑު މިސްކިތަށް ފުރޮޅުލީ ގޮނޑީގައި ގެންގޮސް ޠަވާފުލް ޤުދޫމް ކުރުމުގައި އެހީތެރިވެފައިވާ ކަމަށެވެ. އަދި މައްކާގެ ހުރުމަތްތެރިވެގެންވާ ބިމުގައި ހުރުމުގެ ހުރިހާ ކަމެއް ކުރުމަށް ދެ އަންހެން މުޠާވިފުން ހަމަޖެއްސި ކަމަށްވެސް ރިޒާ ބުނެފައިވެއެވެ.

މަދީނާގައި ހުންނަ ކީރިތި ރަސޫލާގެ މިސްކިތުގައި ނަމާދު ކުރުމުގެ ފުރުސަތު ހޯދައިދިނުމަށްފަހު ހުކުރު ދުވަހުއަނެއްކާވެސް ހަމްދިއްޔާ މައްކާއަށް ގެނެސް މީހުން މަދުވުމުން ޠަވާފުލް އިފާޟާ އަދާކުރުމުގެ ފުރުސަތު މުޠާވިފުން ވަނީ އޭނާ އަށް ފަހިކޮށްދީފައެވެ.

ހައްޖުގެ މަތިވެރި އަޅުކަން އަދާކުރުމަކީ އަބަދުވެސް ހަމްދިއްޔާ ދެކެމުންއައި ހުވަފެނެކެވެ. މިއަހަރުގެ ހައްޖު މޫސުމުގައި އޭނާވަނީ މި އަޅުކަން ފުރިހަމައަށް އަދާކޮށްފައެވެ. ފަސޭހަ ކަމާއި އަރާމުގައި މި އަޅުކަން ކުރެވޭނެ މަގު ފަހިކޮށްދިން މުޠާވިފުންނަށް ޝުކުރު އަދާކުރާކަމަށް ހަމްދިއްޔާ ވަނީ ބުނެފައެވެ.