ނޮވެމްބަރ 11ގެ ފަހުން މަޖިލީހުގެ ރައީސަށް ރައީސުލްޖުމުހޫރިއްޔާ ކަމުގެ މަގާމަށް އައުމަށް ޤާނޫނު ތަނެއްނުދޭ: މެމްބަރު ނަޝީދު

ނޮވެމްބަރ 11 ގެ ފަހުން މަޖިލީހުގެ ރައީސަށް ރައީސުލްޖުމުހޫރިއްޔާ ކަމުގެ މަގާމަށް އައުމަށް ޤާނޫނު ތަން ނުދޭކަމަށް ކުޅުދުއްފުށީ ދެކުނު ދާއިރާގެ އިއްޒަތްތެރި މެމްބަރު މުހައްމަދު ނަޝީދު ވިދާޅުވެއްޖެ އެވެ.

މިއަދުގެ ރައްޔިތުންގެ މަޖިލީހުގެ ޖަލްސާ އަށް މެދުހެންވޭރު ދާއިރާގެ މެންބަރު އަލީ އާޒިމް ހުށަހަޅުއްވާފައިވާ ކުއްލި މައްސަލަ އަށް ބަހުސް ކުރައްވަމުން ނަޝީދު ވިދާޅުވީ ނޮވެމްބަރ 11 ގެ ފަހުން މަޖިލީހުގެ ރައީސަށް ރައީސުލްޖުމުހޫރިއްޔާ ކަމުގެ މަގާމަށް ދެވުމަކީ ގާނޫނުއަސާސީ ދަންނަ އެއްޗެއް ނޫން ކަމަށާއި ގާނޫނު އަސާސީގައި ބުނެފައި ވަނީ އިންތިހާބުކުރެވިފައިވާ ރައީސުލްޖުމްހޫރިއްޔާ ނުވަތަ އޭނާގެ ނާއިބު ކަނޑައެޅިފައިވާ ރިޔާސީ ދައުރު ހަމަވުމުގެ ކުރިން އިސްތިއުފާ ދެއްވައިފި ނަމަ އަމަލުކުރަން ޖެހޭނެ ގޮތުގެ ވާހަކަ ކަމަށެވެ. އަދި ގާނޫނު އަސާސީގައި ބުނެފައިވާ ތާރީހަށް ރައީސަކު ނުހޮވިއްޖެ ނަމަ އަމަލު ކުރާން ޖެހޭނެ ގޮތެއް ގާނޫނު އަސާސީގައި ބުނެދީފައި ނުވާ ކަމަށް ނަޝީދު ވިދާޅުވި އެވެ.

ސެޕްޓެމްބަރު މަހުގެ ހަތް ވަނަ ދުވަހު ބޭއްވި ރިޔާސީ އިންތިހާބު ބާތިލު ކުރުމަށް ފަހު ސުޕްރީމް ކޯޓުން ކުރި ހުކުމުގައި ރައީސުލްޖުމްހޫރިއްޔާއަކު ހޮވަން ޖެހޭ ތާރީހަށް ނުހޮވިއްޖެ ނަމަ އިންތިހާބު ކުރެވިފައި ހުރި ރައީސް އާ ބޭފުޅަކު ރައީސް ކަމަށް އިންތިހާބު ކުރެވެންދެން ހުންނާނެ ކަމަށް ސުޕްރީމް ކޯޓުގެ ހުކުމުގައި ބުނެފައިވާ ކަން ފާހަގަ ކުރައްވަމުން ނަޝީދު ވިދާޅުވީ ނޮވެންބަރު 11 ފަހުން ރައީސް އަކު އިންތިހާބު ނުކުރެވެނީސް ޑރ. ވަހީދު އިސްތިއުފާ ދެއްވައިފި ނަމަ މަޖިލީހުގެ ރައީސް އަށް ރައީސުލްޖުމްހޫރިއްޔާ ކަމުގެ މަގާމް އަދާ ނުކުރެވޭނެ ކަމަށެވެ.

ނަޝީދު އިތުރަށް ވިދާޅުވީ  ނޮވެމްބަރު 11ގެ ކުރިން އޮތް ކުރު މުއްދަތުގެ ތެރޭގައި ވެސް ރައްޔިތުންގެ މަޖިލީހުގެ މެންބަރުން ބޭނުންވެއްޖެ ނަމަ ގާނޫނު އަސާސީ އަށް އެބައި އިތުރު ކުރެވިދާނެ ކަމަށެވެ.