ރިޔާސީ އިންތިހާބު ނޮވެމްބަރު 9 ގައި ބާއްވަން އިލެކްޝަނުން ނިންމައިފި

އެކި މައްސަލަތަކާއި ސަބަބުތަކާހުރެ ލަސްވެފައިވާ ރިޔާސީ އިންތިހާބު ނޮވެމްބަރު 9 ގައި ބާއްވަން އިލެކްޝަނުން ނިންމައިފި އެވެ.

އިލެކްޝަން ކޮމިޝަނުން މިރޭ ބޭއްވި ނިއުސް ކޮންފަރެންސްގައި ވާހަކަ ދައްކަވަމުން އެ ކޮމިޝަންގެ ރައީސް ފުއާދު ތައުފީގު ވިދާޅުވީ ރިޔާސީ އިންތިހާބުގެ ފުރަތަމަ ބުރު ބާއްވާނީ ނޮވެމްބަރު މަހުގެ 9 ވަނަ ދުވަހު ކަމަށާއި އަދި ދެވަނަ ބުރަކަށް ދާންޖެހިއްޖެ ނަމަ ދެވަނަ ބުރު ނޮވެމްބަރު 16 ގައި ބާއްވާނެ ކަމަށެވެ.

ފުރަތަމަ ބުރު 9 ގައި ބާއްވާފައި ދެވަނަ ބުރު 16 ގައި ބޭއްވުމުން ނޮވެމްބަރު 11 ގެ ފަހުން (ރައީސްކަމުގެ މަގާމުގައި މީހަކު ނެތި) ހޭދަވާ ދުވަސްކޮޅަށް އިންތިޒާމެއް ހަމަޖެއްސުމަކީ އިލެކްޝަންސް ކޮމިޝަންގެ މެންޑޭޓްގައި ހިމެނޭ ކަމެއް ނޫންކަމަށް ވެސް އިލެކްޝަނުން ބުނި އެވެ.

ކޮމިޝަނުން މައުލޫމާތު ދިންގޮތުގައި 9 ނޮވެމްބަރުގައި ބާއްވާ އިންތިހާބަށް އަމިއްލަ ރަށް ނޫން ރަށެއްގައި ވޯޓުލުމަށް އިތުރަށް ރަޖިސްޓަރ ކުރަން ނުޖެހޭނެ ކަމަށާއި މާދަމާ ޑީއެންއާރު ލިސްޓް އިއުލާން ކުރާނެ ކަމަށެވެ. އަދި ޝަކުވާ ހުށަހެޅުމުގެ ފުރުސަތު ވެސް މާދަމާ ހުޅުވާލާނެ އެވެ.

ހިޔާލުތަފާތުވުން އުފެދިފައިވާ ލިސްޓް ތަކުގައި ސޮއި ކުރުމުގެ ޓައިމްފްރޭމްއަށް ވެސް ކެންޑިޑޭޓުން މަންދޫބުންގެ މެދުގައި އެއްބަސްވެވިފައި ވާކަމަށް އިލެކްޝަނުން ބުނެއެވެ.