ވައިކަރަދޫގެ ދެ ސްކޫލަކަށް ބޭނުންވާ ބައެއް ތަކެތި ވިލާ ފައުންޑޭޝަނުން ހަދިޔާކޮށްފި

ވިލާ ފައުންޑޭޝަންގެ ފަރާތުން ހދ. އަތޮޅު މަދަރުސާ އަދި ސުލައިމާނިއްޔާ ޕްރީ ސުކޫލަށް ބައެއް ތަކެތި ހަދިޔާކޮށްފި އެވެ.

މިގޮތުން އަތޮޅު މަދަރުސާގެ ކޮމްޕިއުޓަރ ލެބް ތަރައްގީ ކުރުމަށް 12 ކޮމްޕިއުޓަރ ސިސްޓަމާއި 1 ލޭޒަރ ޖެޓް ޕްރިންޓަރ ވިލާއިން ހަދިޔާކޮށްފައިވާއިރު ސުލައިމާނިއްޔާ ޕްރީ ސުކޫލަށް 56 އިންޗީގެ އެލްއީޑީ ޓީވީ އަކާއި ކޮމްޕިއުޓަރ ސިސްޓަމަކާއި ފޮޓޯކޮޕީ މެޝިނެއް ވަނީ ހަދިޔާ ކޮށްފަ އެވެ.

މިދިޔަ ހުކުރު ދުވަހު ވައިކަރަދުއަށް މިތަކެތި ގެނެސް ސްކޫލުތަކާ ހަވާލުކޮށްފައިވާކަމަށް ވައިކަރަދޫ ޖުމްހޫރީ ޕާޓީގެ ގޮފިން ހާމަކުރެ އެވެ.

މައުލޫމާތު ލިބިފައިވާ ގޮތުގައި މިއަހަރުގެ މެއި މަހުގެ ތެރޭގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވައިކަރަދުއަށް ވަޑައިގެން އެހީ ފޯރުކޮށްދެއްވާނެކަމަށް ވަނީ ވައުދުވެވަޑައިގެންފަ އެވެ. އަދި މި ތަކެއްޗަކީ އެދުވަހު ވައުދުވެވަޑައިގަތް ތަކެތީގެ ތެރެއިން ބައެކެވެ.