އަބޫދާބީގެ މިސްކިތެއްގެ ބޭރުގައި “ބޭއަދަބީ” ޕޯސްއެއްގައި ރިހާނާ ފޮޓޯތަކެއްނެގި މައްސަލަ ހޫނުވެއްޖެ

ޕޮޕް ރާނީ ރިހާނާ އަބޫދާބީގެ ޝެއިޚު ޒައިދު މިސްކިތް ކުރިމަތީގައި “ބޭއަދަބީ” ޕޯސްއެއްގައި ފޮޓޯތަކެއް ނެގި މައްސަލަ ހޫނުވެއްޖެ އެވެ.

މިސްކިތުގެ ކުރިމަތީގައި މި ފޮޓޯތައް ނަގާ އޭނާގެ އިންސްޓެގްރާމުގައި އާއްމުކޮށްފައިވާއިރު އެއީ ބޭއަދަބީ ފޮޓޯތަކެއް ކަމަށްބުނެ ރިހާނާ ވަނީ އެތަނުން ފޮނުވާލާފައެވެ. އަދި މިސްކިތަށް ވަނުމުގެ ފުރުސަތު އޭނާއަށް ވަނީ ނުދީފަ އެވެ.

އަބޫދާބީގައި ކޮންސަރޓެއް ބޭއްވުމަށް ޔޫއޭއީއަށް ގޮސްގެން އުޅޭ ރިހާނާ، ކަޅުކުލައިގެ ސޫޓެއްލައި މުޅި ހަށިގަނޑު ނިވާކޮށްފައިވާ ރިހާނާ މި ފޮޓޯތަކުގައި ހުރީ އިސްތަށިގަނޑު ނިވާކުރުމަށް ބޮލުގައި ސްކާފެއްވެސް އަޅާފަ އެވެ. އެހެން ނަމަވެސް މިސްކިތުގެ އެތެރެއަށް އޭނާ ވަނުމުގެ ކުރިން އެތަނުން ފޮނުވާލާފައިވަނީ ތަނުގެ ހުރުމަތް ކެނޑޭފަދަ ފޮޓޯތަކެއް ނެގުމުން ކަމަށް ޝެއިޚް ޒައިދު މިސްކިތުން ނެރެފައިވާ ބަޔާނެއްގައި ވެއެވެ. މިގޮތުން އެއް ފޮޓޯގައި މިސްކިތުގެ ގޯތި ތެރޭގައި އުއްޑުން އޮށޯވެގެން އޮތް އިރު އަނެއް ފޮޓޯގައި ހުރީ މަޝްހޫރު “އަކިންބޯ” ޕޯސް ގައެވެ.

މިސްކިތުން އެންގި އެންގުމަށް ރިހާނާ ވަގުތުން ރައްދު ދީފައިނުވިނަމަވެސް އޭނާ ވަނީ ހޮނިހިރު ދުވަހުގެ ރޭ އަބޫ ދާބީގައި ޝޯހުށައަޅައިދީފަ އެވެ. — ސީއެންއެން —