12 އަންހެން ދަރިންނަށް ހަށިވިއްކުމަށް މަޖުބޫރުކުރި މަންމައަކު ހައްޔަރުކޮށްފި

12 އަންހެން ދަރިންނަށް ހަށިވިއްކުމަށް މަޖުބޫރުކުރި ކޮލަމްބިއާގެ މަންމައަކު ހައްޔަރުކޮށްފިއެވެ.

މަގްރިތާ ޒަޕާތާ މޮރީނޯ ނަމަކަށްކިޔާ އުމުރުން 45 އަހަރުގެ މި އަންހެންމީހާ މިދިޔަ ހަފްތާގައި ހައްޔަރުކޮށްފައިވަނީ މިކަމުގައި އެހީތެރިވާ 51 އަހަރުގެ ކޮންޓްރެކްޓަރާއެކު އެވެ. ކޮލަމްބިއާގެ ވެރިރަށް ބޮގޯޓާގައި މި އަންހެން މީހާ ހައްޔަރުކޮށް ކެމެރާގެ ކުރިމައްޗަށް ގެނައުމުން އޭނާ އަށްވަނީ ރޮވޭގޮތްވެފައެވެ. އެހެން ނަމަވެސް ބޮގޯޓާގެ މެޓްރޮޕޮލިޓަން ޕޮލިހުން ބުނެފައިވަނީ މަގްރިތާ އޭނާގެ 12 އަންހެން ދަރިންގެ އިއްފަތް ނަގާލާފައިވަނީ އެތައް ސަތޭކަ ޑޮލަރަށް ކަމަށާއި އެކުދިން ހަވާލުކޮށްފައިވަނީ އެއަންހެން ކުދިންނަށް ވުރެ އެތައް ތަނެއް ދޮށީ ފިރިހެނުންނާ ކަމަށެވެ

މިގޮތުން ކޮންމެ އަންހެން ކުއްޖެއްގެ އިއްފަތް ކޮލަމްބިއަން ފައިސާގެ 3 ލައްކަ އާއި 4 ލައްކައިގެ އަދަދަކަށް ވިއްކާފައިވާ ކަމަށް ކަމާބެހޭ ފަރާތްތަކުން ތުހުމަތުކޮށްފައިވާއިރު މަގްރިތާ ވަނީ މިކަމަށް ދެކޮޅުހަދާފައެވެ.

ޕޮލިހުން ބުނީ މިކަމުގެ މައުލޫމާތު އެމީހުންނަށް ލިބިފައިވަނީ މިކަމުގެ ޝިކާރައަކަށްވެފައިވާ އުމުރުން 14 އަހަރުގައި ފިރިހެން ކުއްޖަކު ވިހާފައިވާ އެ އަންހެން މީހާގެ ދަރިއަކު މި މައްސަލަ ހުށައެޅުމުން ކަމަށެވެ. އެފަހަރު އަންހެން ކުއްޖާ މަންމަގެ އަމުރާ ދެކޮޅަށް ދަރިފުޅު އެބޯޓު ނުކޮށް އޭނާ ވަނީ ވިހާފައެވެ.

ސީއެންއެން އަށް މައުލޫމާތު ދެމުން މެޓްރޯޕޮލިޓަން ޕޮލިހަކު ބުނެފައިވަނީ ވަރަށް ހަގު އުމުރުން ފެށިގެން އުމުރުން ދުވަސްވީ މީހުންގެ ޖިންސީ ގޯނާގެ ޝިކާރައަކަށްވެ މުޅި ދިރިއުޅުން “ނަރަކަ” އަކަށް ވެފައިވާ ކަމަށް އަންހެން ކުއްޖާ ބުނެފައިވާ ކަމަށެވެ. އޭރުގެ  މިމައްސަލަ ތަހުގީގު ކުރުމަށް އަހަރަކަށްވުރެ ގިނަ ދުވަސް ނަގާފައިވާއިރު ދިގުދެމިގެންގޮސްފައިވަނީ އޭރު 14 އަހަރުގެ އަންހެން ކުއްޖާ ޕޮލިހަށް ދިޔަކަން އެނގި އެކުއްޖާ މަރާލާނެ ކަމަށް މަންމަ ބުނުމުން މިހާރު 16 އަހަރުވެފައިވާ މި ކުއްޖާ ފިލާފައިވާތީ އެވެ. މިކުއްޖާ އަލުން ފެނުމަށްފަހު އެ އަންހެން ކުއްޖާ ވަނީ އޭނާއާއި ގަދަކަމުން ފިރިހެނަކު ޖިންސީ ގުޅުން ހިންގާފައިވާ ކަމަށާއި އޭނާ މާބަނޑުވެފައިވަނީ އޭނާގެ ސަބަބުން ކަމަށް ރިޕޯޓު ކޮށްފައެވެ.

މިކުދިންނާމެދު ގަދަކަމުން ޖިންސީގުޅުން ހިންގި 51 އަހަރުގެ ފިރިހެންމީހާ ހައްޔަރުކޮށްފައިވާއިރު ޕޮލިހުން ވަނީ އެހެން އަންހެން ކުދިންވެސް މިމައްސަލައާގުޅޭ އިތުރު މައުލޫމާތު ފޯރުކޮށްދިނުމަށް އެދިފައެވެ. މާގާޓިޓާ އޭނާގެ އަންހެން ދަރިންނަށް ރާބޮއި ޑްރަގު ބޭނުން ކުރުމަށް މަޖުބޫރުކޮށްފައިވާ ކަމަށާއި އޭގެ ތެރެއިން ބައެއްކުދިން ހަށިވިއްކާ ކުދިންނަށްވެ، ގެއްލިފައިވާ ކަމަށްވެސް ފުލުހުން ހާމަކުރެއެވެ.

ކަމާބެހޭ ފަރާތްތަކުން ހާމަކުރާ ގޮތުގައި މި އަންހެން މީހާއަށް ލިބިފައިވާ ކުދިންގެ ތެރެއިން ހަށިވިއްކުމަށް މަޖުބޫރުކޮށްފައި ނުވަނީ އެންމެ ހަގު ދެކުދިންނަށެވެ. އުމުރުން 9 އަހަރާއި 11 އަހަރުގެ މި ދެކުދިންނަށް މިކަމަށް އަމުރުނުކުރަނީ އެކުދިންގެ އުމުރުގެ ހަގުކަމުންކަމަށް ވެއެވެ. –ސީއެންއެން–