ކުޅުދުއްފުށީ މަގު ބައްތިތައް، ލެޑްލައިޓަށް ބަދަލު ކުރުމުގެ މަސައްކަތް ކައުންސިލުން ފަށައިފި

ކަރަންޓަށް ކުރާ ހަރަދުގެ މިންވަރު މަދު ކުރުމަށްޓަކައި ސަރުކާރުން ކުރިއަށް ގެންދާ ފަހި އަލި ޕްރޮޖެކްޓުގެ ދަށުން ކުޅުދުއްފުށީ މަގު ބައްތިތައް ލެޑްލައިޓަށް ބަދަލު ކުރުމުގެ މަސައްކަތް ކުރިއަށްދާ ކަމަށް ކައުންސިލުން ހާމަކޮށްފި އެވެ.

ކުޅުދުއްފުށީ ކައުންސިލްގެ ނައިބު ރައީސް ފާރޫގު މުހައްމަދު ވިދާޅުވީ ކަރަންޓަށް ކުރާ ހޭދަ ކުޑަ ކުރުމުގެ ގޮތުން ކުޅުދުއްފުށީ މަގު ބައްތި ތައް ލެޑްލައިޓަށް ބަދަލު ކުރުމުގެ މަސައްކަތް މީގެ ދެހަފްތާ ކުރިން ފެށިގެން ކުރަމުން އަންނަކަމަށާއި މިގޮތުން ސަތޭކަ އަށް ވުރެ ގިނަ މަގު ބައްތި ތަކުގައި ލެޑް ހަރުކުރެވޭނެކަމަށެވެ.

“އަޅުގަނޑުމެންނަން ލިބިފައިވަނީ ސަތޭކަ އެއްހާ ލެޑް،އެއްޗެހި އެއްކޮށް ހުސްވަންދެން ހަރުކުރެވޭނެ” ފާރޫޤު ވިދާޅުވި އެވެ.

ލެޑް ތަކުގެ އިތުރުން ފަހި އަލި ޕްރޮޖެކްޓުގެ ތެރެއިން ކުޅުދުއްފުއްޓަށް އެނާޖީ އެފިޝަންޓް 40 ވަރަކަށް ހާބަރު ލައިޓް ވެސް ލިބިފައިވާ ކަމަށާއި އެލައިޓް ތައް ވެސް ކުރިއަށް އޮތް މަދު ދުވަސް ކޮޅު ތެރޭގައި ހަރުކުރެވޭނެކަމަށް ފާރޫޤު ވިދާޅުވި އެވެ.

ފަހިއަލި ފްރޮގުރާމުގެ ދަށުން ރާއްޖޭގެ ފަސް ސަރަހައްދެއް ހިމެނޭ ގޮތަށް 200 އެނާޖީ އެފިޝަންޓް ހާބަރު ލައިޓް ދޫކުރުމަށް ސަރުކާރުން ވަނީ ނިންމާފައެވެ. އެއީ ކުޅުދުއްފުށީގެ އިތުރުން މާލެ، ތިނަދޫ، ފުވައްމުލަށް އަދި އައްޑޫސިޓީގެ ހިތަދޫ އެވެ.

މީގެ 200 ލައިޓު ހަރުކޮށްގެން، ލައިޓް ދިއްލުމަށް އަހަރަކު ކުރާ ހޭދައިގެ ތެރެއިން ގާތްގަނޑަކަށް 870000ރ. ސަލާމަތް ކުރެވޭނެ ކަމަށް ތިމާވެއްޓާ ބެހޭ ވުޒާރާއިން މައުލޫމާތު ދެއެވެ