ހާސްކަން ފިލުވާލުމަށް ހަރުފަ މަސާޖެއް ތައާރަފް ކޮށްފި

ހާސްކަން ފިލުވާލުމަށް އިންޑޮނޭޝިޔާގައި ހަރުފަ މަސާޖެއް ތައާރަފް ކޮށްފި އެވެ.

އިންސާނާ މާބޮޑަށް ހާސްވެ ކަންބޮޑުވެފައިވާނަމަ އެކަމުން އެމީހާ ބަރީއަ ވުމަކީ ދަތި އުނދަގޫ ކަމެކެވެ. އެހެން ނަމަވެސް އިންޑޮނޭޝިޔާގެ ސެންޓަރަކުން “ސްޓްރެސް” ފިލުވާލާނެ ކަމަށް ބުނެ ހަރުފަ މަސާޖެއް މިވަނީ ތައާރަފްކޮށްފަ އެވެ. އިންޑޮނޭޝިޔާގެ ވެރިރަށް ޖަކާޓާގެ ބާލީ ހެރިޓޭޖް ރެފްލޮކްސޮލޮޖީ އެންޑް ސްޕާ ގެ މުވައްޒަފުންނަށް ބައިވެރިވެވޭގޮތަށް ފުރަތަމަ ތައާރަފްކުރި މި މަސާޖުގެ ސަބަބުން އެމީހެއްގެ ހާސްވާ ހާސްވުން އެތައް މިންވަރަކަށް ކުޑަކޮށްދޭނެ ކަމަށް ވެއެވެ.

ތަފާތު ވައްތަރުގެ ތަފާތު ކުލަކުލައިގެ ހަރުފަ ބުރަކަށި މަތީގައި “ދުއްވައިގެން” ކުރާ އާދަޔާ ޚިލާފް މި މަސާޖުގެ ސަބަބުން އިންސާނާގެ ވިސްނުން ކުރިން ހުރި މިސްރާބު ނޫން އެހެން ދިމާއަކަށް ބަދަލުކޮށްލާނެ ކަމަށް ޖަކާޓާ ސްޕާއިން ހާމަކުރެއެވެ. އަދި މިގޮތަށް ދިމާވަނީ ހަރުފަ ބުރަކަށި މަތީގައި ހަރަކާތް ކުރާވަގުތު އިންސާނާ ގެންފައިވާ ބިރުގެ ސަބަބުން އުފެދޭ “އެޑްރިނާލިން” ހޯމޯނުގެ ސަބަބުން ވިސްނުމަށް ހެޔޮ ބަދަލެއް އައިސް ހަށިގަނޑުގެ ތެރޭގައި ހިނގާ މެޓަބޮލިކް ހަރަކާތްތަކަށް ބަދަލު އަންނާތީ ކަމަށްވެސް އެ ސްޕާއިން ހާމަކުރެ އެވެ.

އެހެން ނަމަވެސް ސައިންސްގެ “ރިލެކްސޭޝަން ތިޔަރީ” ސްޕާގެ މި ވާހަކަތަކާ ފުށުއަރައެވެ. އެހެނީ ހަރުފަ ފަދަ އިންސާނުންނަށް އޭގެ ނުރައްކާތެރިކަން ބޮޑު އެއްޗެއް ހަށިގަނޑުގައި ހަރަކާތްތެރިވާނަމަ މީހާ ބިރުގަނެ އެޑްރިނާލިން އުފެދޭ މިންވަރު އިތުރުވެގެންދާނެ އެވެ. އަދި މިކަމުގެ ސަބަބުން ހިތުގެ ހިނގުން އަވަސްވެ ލޭގެ ޕްރެޝަރު މަތިވެގެންދާނެ އެވެ. އަދި ހަށިގަނޑުން އެތައް ހަކަތައެއް ބޭރުވެ މީހާ އިތުރަށް ހާސްކުރުވަ އެވެ. މީގެ އިތުރުން ގަނެފައިވާ ބިރުގެ ސަބަބުން ހަށިގަނޑުގެ މަސްތަކުގެ ބާރުދަށްވެ އިތުރު މަސާޖެއް ކުރުމަށް ބޭނުންވުމަކީވެސް ވުން ގާތްކަމެކެވެ.

އެހެންނަމަވެސް ހަރުފަޔަށް ލޯބިކުރާ އެއާމެދު ހިތްހަމަޖެހޭ ފަރާތްތަކަށް މި މަސާޖަކީ ވަރަށް ހިތްގައިމު އަދި އަރާމު މަސާޖެއްކަމުގައި ނޫނީ ނުވާނެ އެވެ. އަދި މިކަމުގެ ސަބަބުން މީހާގެ ހާސްކަން ފިލައި ހަށިގަނޑާއި ސިކުނޑި ހަމަޔަކަށް އެޅިގެންވެސް ދާނެ އެވެ. މި މަސާޖުގެ އާޚިރު ނަތީޖާ ކޮންމެ ގޮތަކަށް ނުކުތް ނަމަވެސް މިކަމަކީ ގިނަ ކަސްޓަމަރުންގެ ސަމާލުކަން ސްޕާއަށްލިބި، ތަނުގެ މަގުބޫލުކަން އިތުރުވެ، އެތަނަށް ފައިދާ އިތުރުވެގެންދާނެ ކަމެއް ކަމަށް ބެލެވެއެވެ. –ޑެއިލީ މެއިލް–