ބަޖެޓްގެ ތާށިކަމުގެ ސަބަބުން މި އަހަރުގެ ނަސްރުގެ ދުވަސް ރަސްމީކޮށް ކުޅުދުއްފުށީގައި ފާހަގައެއް ނުކުރާނެ: ހޯމް މިނިސްޓްރީ

ނަސްރުގެ ދުވަސް ރަސްމީކޮށް ކުޅުދުއްފުށީގައި ކުރިން ފާހަގަ ކުރާ ގޮތަށް ހަމަޖެހިފައި އޮތްނަމަވެސް، ބަޖެޓްގެ ތާށިކަމުގެ ސަބަބުން މިއަހަރު ކުޅުދުއްފުށީގައި ރަސްމީކޮށް އެ ދުވަސް ފާހަގަ ނުކުރާނެކަމަށް މިނިސްޓްރީ އޮފް ހޯމް އެފެއާޒުން ހާމަކޮށްފި އެވެ.

ހޯމްމިނިސްޓްރީގެ ޑެޕިއުޓީ ޑިރެކްޓަރ އައްބާސް ވިދާޅުވީ ނަސްރުގެ ދުވަސް މިއަހަރު ކުޅުދުއްފުށީގައި ރަސްމީކޮށް ފާހަގަ ކޮށްދެއްވުމަށް އެދި ހދ އަތޮޅު ކައުންސިލުގެ އެދުމުގެ މަތިން ކުރިން އެ ދުވަސް ކުޅުދުއްފުށީގައި ފާހަގަ ކުރުމަށް ހަމަޖެހިފައިވީ ނަމަވެސް މިހާރު ބަޖެޓްގެ ތާށި ކަމުގެ ސަބަބުން މިއަހަރު ރަސްމީކޮށް އެދުވަސް ކުޅުދުއްފުށީގައި ފާހަގަ ނުކުރާ ގޮތަށް ނިންމާ ފައިވާ ކަމަށެވެ.

ހދ އަތޮޅު ކައުންސިލުގެ ރައީސް ހުސެއިން ރަޝީދު ވިދާޅުވީ ސަރުކާރުން ގައުމީ ފެންވަރުގައި ނަސްރުގެ ދުވަސް ކުޅުދުއްފުށީގައި މިއަހަރު ފާހަގަ ނުކުރިނަމަވެސް އަތޮޅު ކައުންސިލާއި އެމްއެންޑީއެފްގެ ނޮދަރ އޭރިއާރ ގުޅިގެން އެދުވަސް ކުޅުދުއްފުށީގައި ފާހަގަ ކުރުމަށް ވާހަކަ ދެކެވިފައިވާ ކަމަށެވެ. އަދި އެގޮތުން އެދުވަހު ކުޅުދުއްފުށީގައި އެމްއެންޑީއެފްގެ ރޫޓް މާޗިންއަކާއި އެރޭ ޖަލްސާ އެއް ބޭވުމަށް ހަމަޖެހިފައިވާ ކަމަށް ހުސެއިން ވިދާޅުވިއެވެ.

އައްބާސް ވިދާޅުވީ މިއަހަރު ރަސްމީކޮށް ނަސްރުގެ ދުވަސް ކުޅުދުއްފުށީގައި ފާހަގަ ނުކުރެވުނު ކަމުގައި ވީނަމަވެސް މި އަންނަ އަހަރު އެދުވަސް ފާހަގަ ކުރުމަށް ކުޅުދުއްފުއްޓަށް އިސްކަން ދެވޭނެ ކަމަށެވެ.

ނަސްރުގެ ދުވަސް ފާހަގަ ކުރަނީ 1988 ވަނަ އަހަރު ނޮވެމްބަރ 3 ވަނަ ދުވަހު ރާއްޖޭގެ ބަޔަކާއި ލަންކާގެ ތަމަޅައިގެ ބަޔަކާއި ގުޅިގެން ރާއްޖެއަށް ދިން އުދުވާނީ ހަމަލާ ޝަހީދުވި އަބްޠާލުންގެ ޒިކުރާ އާ ކުރުމަށްޓަކައެވެ.

މިއަހަރު 25 ވަނަ ނަސްރުގެ ދުވަސް ދިވެހިންނާއި ކުރިމަތިލާއިރު މިދުވަހުގެ ހަޤީޤީ ބަޠަލު، ޝަހީދު ހުސައިން އާދަމަކީ ކުޅުދުއްފުއްޓަށް އުފަން ދަރިއެކެވެ.