ހޮނޑައިދޫ މައްސަލައިގައި ހިމެނޭ ޖާދުﷲގެ މައްޗަށް އުފުލި ކެނަބިހުގެ ދައުވާއަށް އެނާ އިންކާރު ކުރައްވައިފި

އަލިދޫ ރިސޯޓުގެ ޖެނެރަލް މެނޭޖަރަކަށް ހުރި ޖާދުﷲ ޖަމީލް ގެ މައްޗަށް ދައުލަތުން އުފުލާފައިވާ ކެނަބިހުން މުއާމަލާތްކުރުމުގެ ކުށުގެ ދައުވާ އަށް އޭނާ އިންކާރު ކުރައްވައިފި  އެވެ.

ޖާދުﷲ ޖަމީލު މި ދައުވާ އަށް އިންކާރު ކޮށްފައިވަނީ މިއަދު މިކަމަށްޓަކައި ކުރިމިނަލް ކޯޓްގައި ބޭއްވި ޝަރީއަތުގެ މަޖިލީހުގަ އެވެ.

މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހު ހދ. ހޮނޑައިދޫ އުތުރު ފަރާތުގެ ހަޓެއްކައިރިން އިތުރު ބަޔަކާ އެކު ހުއްޓައި ޖާދުﷲ ފެނުނުއިރު އޭނާ ހުރި ތަނުގެ ބިންމަތިން ކެނަބިސް ފެނިފައިވާތީ އުފުލި މިދައުވާއަށް ޖާދުﷲ އިންކާރު ކުރާކަން ހާމަ ކުރަމުން އޭނާގެ ޤާނޫނީ ވަކީލާ ވިދާޅުވީ އެތަކެތިން ޖާދުﷲގެ ފިންގާ ޕްރިންޓް ނުފެންނަ ނަމަ އެތަނުން ފެނުނު މަސްތުވާތަކެއްޗަށް އޭނާ ޒިންމާވާން ނުޖެހޭނެ ކަމަށެވެ.

ޖާދުﷲ ދައުވާއަށް އިންކާރު ކުރުމުން ދައުވާ ސާބިތު ކުރުމަށްޓަކައި ދައުލަތުން ވަނީ ހާދިސާ ހިނގިތަނަށް ދިޔަ ތިން ފުލުހެއްގެ ހެކިބަހާއި މަސްތުވާތަކެތީގެ ތަހުލީލު ރިޕޯޓު ހުށައަޅާފަ އެވެ.

ނަމަވެސް ޖާދުﷲގެ ފަރާތުންވެސް ވަނީ ހދ. ކުޅުދުއްފުށީ ޕޮލިސް ޓޭޝަންގައި މަސައްކަތްކުރާ ތިން ފުލުހެއް ހެކިންގެ ގޮތުގައި ހުށައަޅާފައެވެ. އެއީ އަހްމަދު ނަމަކަށް ކިޔާ ފުލުހަކާއި އަޒުމީލް ނަމަކަށް ކިޔާ ފުލުހެއްގެ އިތުރުން އަލީ ރަޝީދު ނަމަކަށް ކިޔާ ފުލުހެއް ކަމަށް ޖާދުﷲގެ ވަކީލު ވިދާޅުވެފައި ވެއެވެ.

ޖާދުﷲގެ ފަރާތުން ހުށައެޅި ތިން ފުލުހުންގެ ފުރިހަމަ ނަމާއި އެޑްރެސް މާދަމާ 12:00ގެ ކުރިން ކޯޓަށް ހުށަހެޅުމަށް ގާޒީ ވަނީ އަންގާފަ އެވެ.