ވަޑި ހަސަންބެގެ އޮޕަރޭޝަނަށް ބޭނުންވާ ފައިސާ އަދި ހަމައެއް ނުވޭ: އާއިލާ

ބަނޑުގެ އޮޕަރޭޝަނެއް ކުރުމަށް ބޭނުންވެފައިވާ ކުޅުދުއްފުށީ، ވަޑި ހަސަންބެގެ އޮޕަރޭޝަނަށް ބޭނުންވާ ފައިސާ ހަމަ ނުވާ ކަމަށް އެ އާއިލާއިން ހާމަކޮށްފި އެވެ.

މިނޫހުން ކުރި ސުވާލަކަށް ޖަވާބުދެމުން ވަޑި ހަސަންބެގެ ދަރިފުޅު މަރިޔަމް ބުނީ ބައްޕަގެ އޮޕަރޭޝަން ކުރުމަށް ބޭނުންވާ ފައިސާ ހަމަނުވާ ކަމަށާއި އެހެން ނަމަވެސް ވަރަށް ގިނަ ފަރާތްތަކެއްގެ ދީލަތި އެހީތެރިކަން މިހާރުވެސް ލިބިފައިވާ ކަމަށެވެ. މިގޮތުން މިހާރު 1300 އެއްހާ ޑޮލަރު ލިބިފައިވާ ކަމަށާއި އިތުރަށް 3000 ހެއްހާ ޑޮލަރު ބޭނުންވާ ކަން މަރީ ބުންޏެވެ.

މިހާރު ހަސަންބެގެ ބަނޑުގެ ބޭރަށް ހޮޅިއެއް ގުޅާފައިވާ ކަމަށާއި 2 މަސް ފަހުން އެތެރެއަށް ހޮޅި ލެއްވުމަށް އަލުން އިންޑިޔާއަށް ދާންޖެހޭ ކަމަށް މަރީ ބުންޏެވެ. ފައިސާ ބޭނުންވަނީ ހޮޅި ލެއްވުމަށް ކުރަންޖެހޭ އޮޕަރޭޝަނަށް ކުރުމަށް ކަމަށް އާއިލާއިން މައުލޫމާތު ދެއެވެ.

ހެޔޮއެދޭ ފަރާތްތަކުގެ އެހީތެރިކަން ވަރަށް ބޮޑަށް ލިބިފައިވާކަން ފާހަގަ ކުރަމުން މަރީ ބުނީ ކުޅުދުއްފުށީ ޖަމިއްޔާތަކުގެ ތެރެއިން އެހީތެރިކަން ލިބިފައިވަނީ “ކޮރަލް” ގެ ފަރާތުން ކަމަށެވެ.

“ބައްޕަ މިހާރު އޮތީ ރަށުގަ. އަދި ފައިސާ ހަމައެއް ނުވޭ. އެކަމަކު ވަރަށް ގިނަ މީހުން އެހީތެރިވެދިން އޭރު މިކަން އެނގުނު ފަހުން. ބައްޕަ ރަށަށް ގެނައި ފަހުންވެސް އެހީތައް ލިބުން” މަރީ ބުންޏެވެ.

މަރީ އިތުރަށް ބުނީ އަދިވެސް އިތުރަށް ފައިސާ ބޭނުންވާ ކަމަށާއި 2 މަސްވާ ދުވަހު ކޯޗިން އަށް ދިޔުމަށް ފައިސާ ލިބޭނެ ކަމަށް އުއްމީދުކުރާ ކަމަށެވެ.

ކުޅުދުއްފުށީ އަލިހާ ހަސަން މޫސާ، ވަޑި ހަސަންބެ (50އ) ގެ ބަނޑުގައި ހިލައުފެދުމުގެ ސަބަބުން ހުސްވި ސެޕްޓެމްބަރު މަހުގެ 25 ވަނަ ދުވަހު ވަނީ އޮޕަރޭޝަނެއް ކޮށްފައެވެ. އެހެން ނަމަވެސް އޮޕަރޭޝަނަށްފަހު ބަނޑުގައި ފެން ހެދުމުގެ ސަބަބުން އިތުރު އޮޕަރޭޝަނެއް ކުރަންވަނީ ޖެހިފައެވެ. މި އޮޕަރޭޝަނަށް 52000 ރުފިޔާ ހަރަދުވާނެ ކަމަށް ޑޮކްޓަރުން ލަފާކުރެއެވެ.

ހަސަންބެއަށް ފައިސާގެ ދީލަތި އެހީ ދެއްވަން ބޭނުންވާ ފަރާތަކުން މަރިޔަމް ހަސަންގެ ބޭންކް އޮފް މޯލްޑިވްސްގެ 7706345974001 ނަމްބަރު އެކައުންޓަށް ނުވަތަ 7706345974002 ގެ ނަމްބަރު އެކައުންޓަށް ފައިސާ ޖަމާކުރުމަށް އާއިލާއިން އެދެއެވެ.