ހަވާ އެރުމުގެ ހަރަކާތްތަކާއެކު ނަސްރުގެ ދުވަހުގެ ހަރަކާތްތައް ހޮނިހިރު ދުވަހުގެ ރޭ ކުޅުދުއްފުށީގައި ފެށޭނެ: އެމްއެންޑީއެފް

ހަވާ އެރުމުގެ ހަރަކާތްތަކާއެކު ނަސްރުގެ ދުވަހުގެ ހަރަކާތްތައް ހޮނިހިރު ދުވަހުގެ ރޭ ކުޅުދުއްފުށީގައި ފެށޭނެ ކަމަށް އެމްއެންޑީއެފް އިން ހާމަކޮށްފި އެވެ.

އެމްއެންޑީއެފްގެ ތަރުޖަމާނު ކާނަލް އަބްދުއްރަހީމް މިނޫހަށް މައުލޫމާތު ދެއްވަމުން ވިދާޅުވީ ކުޅުދުއްފުށީގައި ނަސްރުގެ ދުވަހުގެ ހަރަކާތްތައް ފެށިގެންދާނީ ނޮވެމްބަރ 2 ވާ ހޮނިހިރު ދުވަހުގެ ރޭ ބާއްވާ ބަޑިބޭހާއި ހަވާއެރުވުމުގެ ކުޅިވަރުތަކުން ކަމަށެވެ. އަދި މާލެއާއި އެމްއެންޑީއެފްގެ ހުރިހާ އޭރިޔާތަކެއްގައި 3 ވަނަ ދުވަހު ފަތިސް ނަމާދު އެއް ޖަމާއަތެއްގައި ކުރުމަށްފަހު ދުވަހާގުުޅޭ ޚާއްސަ ދުއާއެއް ކުރުން އޮންނާނެ ކަަމަށް އަބްދުއްރަހީމް ވިދާޅުވި އެވެ.

މީގެ އިތުރުން ނަސްރުގެ ދުވަހު ހަވީރު 4:30 ގައި ކުޅުދުއްފުށީގެ މަގުތަކުގައި ޝަރަފުގެ ހިނގާލުން ކުރިއަށްދާނެ ކަމަށާއި އެދުވަހުގެ ރޭ، ދުވަހާ ގުޅޭ ޚާއްސަ ޖަލްސާ ކުޅުދުއްފުށީ އަފީފުއްދީން ސްކޫލުގައި އޮންނާނެ ކަމަށްވެސް އަބްދުއްރަހީމް ވިދާޅުވި އެވެ. މި ޖަލްސާގައި އައްޑަނަ މަޖައްލާގެ ހާއްސަ އަދަދެއް ނެރުން އޮންނާނެ އެވެ.

ނަސްރުގެ ދުވަސް ރަސްމީކޮށް ކުޅުދުއްފުށީގައި ކުރިން ފާހަގަ ކުރާ ގޮތަށް ހަމަޖެހިފައި އޮތްނަމަވެސް، ބަޖެޓްގެ ތާށިކަމުގެ ސަބަބުން މި އަހަރު ކުޅުދުއްފުށީގައި ރަސްމީކޮށް އެ ދުވަސް ފާހަގަ ނުކުރާނެ ކަމަށް މިނިސްޓްރީ އޮފް ހޯމް އެފެއާޒުން ހާމަކޮށްފަ އެވެ. އެހެން ނަމަވެސް 3 ނޮވެމްބަރުގެ ހާދިސާއަށް 25 އަހަރު ފުރޭއިރު އެކަމުގެ ގިނަ ހަރަކާތްތަކެއް ޝަހީދު ހުސެއިން އާދަމްގެ އުފަން ރަށްކަމަށްވާ ކުޅުދުއްފުށީގައި ބާއްވަން އެމްއެންޑީއެފުން ވަނީ ނިންމާފަ އެވެ.