ކުޅުދުއްފުށީ ކައުންސިލުގެ ރައީސްގެ މަގާމަށް އަލީ ހަސަން އިންތިހާބު ކޮށްފި

ކުޅުދުއްފުށީ ކައުންސިލުގެ ހުސްވެފައިވާ ރައީސްކަމުގެ މަގާމަށް އަލީ ހަސަން އިއްޔެ އިންތިހާބު ކޮށްފި އެވެ.

މި ހަފުތާގެ އާދިއްތަ ދުވަހު ބޭއްވި ކައުންސިލް ބައްދަލުވުމުގައި އޭރުގެ ރައީސް އިބްރާހިމް ރަމީޒްގެ އިތުބާރުނެތްކަމަށް ފާސްކުރުމާ ގުޅިގެން އައު ރައީސަކު ހޮވުމަށް ވޯޓުލާފައިވަނީ އިއްޔެ އެކައުންސިލުގައި ބޭއްވި ބައްދަލުވުމުގައެވެ.

5 މެމްބަރުންގެ ވޯޓާއެކު އަލީ ހަސަން ރައީސްކަމަށް އިންތިހާބު ކޮށްފައިވާއިރު ކުރީގެ ރައީސް ރަމީޒް ވޯޓުގައި ބައިވެރިވެވަޑައިގެންފައެއް ނުވެއެވެ. ރައީސަކު ހޮވުމަށް އިއްޔެ ބޭއްވި ބައްދަލުވުމުގައި ރައީސްގެ މަގާމަށް ކުރިމަތި ލާފައިވަނީ ކައުންސިލް މެމްބަރު އަލީ ހަސަންގެ އިތުރުން މިހާރު އެ ކައުންސިލުގެ ނައިބު ރައީސްގެ މަގާމުގައި ހުންނެވި ފާރޫގް މުހައްމަދެވެ. ފުރަތަމަ ބުރުގައި މި ދެ މެމްބަރުންނަށް ވޯޓަށް އަހައިގެން ކޮންމެ މެމްބަރަކަށްވެސް ލިބިފައިވަނީ 3 ވޯޓެވެ. އަދި ދެވަނަ ބުރަށް ވޯޓަށް އެހުމުގެ ކުރިން ފާރޫގުވަނީ ނަން އަނބުރާ ގެންގޮސްފައެވެ.

އަލީ ހަސަން އަކީ ކުޅުދުއްފުށި ކައުންސިލްގެ 3 ވަނަ ރައީސެވެ. މީގެ ކުރިން އެ ކައުންސިލުގެ ރައީސްކަން ކޮށްފައިވަނީ ޖަމްޝީދު މުހައްމަދާއި އިބްރާހިމް ރަމީޒެވެ.

ކުޅުދުއްފުށީ ކައުންސިލުގައި ކުރީގެ ރައީސް އިބްރާހީމް ރަމީޒް ފިޔަވައި ދެން ތިއްބެވި 6 ކައުންސިލަރުންނަކީ ވެސް އެމްޑީޕީއަށް ނިސްބަތްވެވަޑައިގަންނަވާ ކައުންސިލަރުންނެވެ. ރަމީޒް އެމްޑީޕީން ވަކިވެ ޖުމުހޫރީ ޕާޓީއަށް ސޮއިކުރެއްވީ ސެޕްޓެމްބަރު މަހުގެ ތެރޭގައެވެ.