ކުޅުދުއްފުށީ ރީޖަނަލް ހޮސްޕިޓަލުގެ ފޯނު ލައިނު ތަކުގެ ޚިދުމަތް ކަނޑާލައިފި

ފޯނު ބިލުތަކަށް ފައިސާ ނުދައްކައިގެން،  ހދ ކުޅުދުއްފުށީ ރީޖަނަލް ހޮސްޕިޓަލުގެ ފޯނު ލައިނުގެ ޚިދުމަތް މެދު ކަނޑާލައިފި އެވެ.

ކުޅުދުއްފުށީ ރީޖަނަލް ހޮސްޕިޓަލުގައި މަސައްކަތް ކުރާ ބައެއް މުއައްޒަފުން މިނޫހަށް ވަނީ މިކަން ކަށަވަރު ކޮށްދެއްވާފަ އެވެ. އަންނަ ކޯލު ތައް ލިބުނު ކަމުގައި ވިޔަސް، ހޮސްޕިޓަލު ފަރާތުން ކުރަންޖެހޭ ކޯލު ތައް ނުކުރެވުމުން ދަތިތަކާއި ދިމާވަމުން އަންނަ ކަމަށް ވެސް އެމުވައްޒަފުން ވަނީ ބުނެފަ އެވެ.

މިވަގުތު ކުޅުދުއްފުށީ ރީޖަނަލް ހޮސްޕިޓަލް ހިންގުމާ ހަވާލުވެ ހުންނެވި ސީނިޔާ ލެބޯޓަރީ ޓެކްނީޝަން ހަދީޖާ އަލީ ވިދާޅުވީ ފޯނު ލައިންގެ ޚިދުމަތް މިވަގުތު ހުރީ މެދުކެނޑިފައި ކަމަށެވެ. އަދި މިގޮތަށް ދިމާވީ ބިލުތަކުގެ ސަބަބުން ކަމަށާއި މީޑިޔާގެ ކޯލަކަށް އުއްމީދު ނުކުރައްވާތީ އިތުރު މައުލޫމާތު ހާމަކުރެވޭނީ ބަޖެޓާއި މަޝްވަރާ ކުރުމަށް ފަހު ކަމަށެވެ.

މިނޫހަށް އެނގިފައިވާ ގޮތުގައި މީގެ ކުރިން އެތައް ފަހަރަކު  ހޮސްޕިޓަލުގެ  ފަރާތުން މިނިސްޓްރީގެ ސަމާލުކަމަށް ވަނީ މިކަން ގެނެސްފަ އެވެ. އެހެން ނަމަވެސް އެކަށީގެންވާ ޖަވާބެއް މިނިސްޓްރީ ދީފައި ނުވާކަން މިނޫހަށް ވަނީ އެގިފަ އެވެ.

ކުޅުދުއްފުށީ ރީޖަނަލް ހޮސްޕިޓަލަކީ މާލެއިން އުތުރުގައި ސަރުކާރުން ގާއިމް ކޮށްފައި ހުންނަ އެންމެ ބޮޑު ހޮސްޕިޓަލެވެ.