ރައީސުލްޖުމްހޫރިއްޔާގެ މަސްއޫލިއްޔަތުތައް ރައްޔިތުންގެ މަޖިލީހުގެ ރައީސާ ހަވާލުކުރުމަށް ކައުންސިލުން ގޮވާލައިފި

2008 ވަނަ އަހަރު އިންތިހާބު ކުރި ސަރުކާރަށް ފަސް އަހަރުގެ ދައުރު ހަމަވެފައިވާތީ، މިހާރު އެސަރުކާރަކީ ޤާނޫނީ ސަރުކާރެއް ނޫން ކަމަށާއި ވަގުތީ ގޮތުން ރައީސުލްޖުމްހޫރިއްޔާކަމުގެ މަސްއޫލިއްޔަތުތަކާއި ވާޖިބުތައް، ރައްޔިތުން މަޖިލީހުގެ ރައީސް އަބުދުﷲ ޝާހިދާ ހަވާލު ކުރުމަށް ކުޅުދުއްފުށީ ކައުންސިލުން ގޮވާލައިފި އެވެ.

ކުޅުދުއްފުށީ ކައުންސިލްގެ ރައީސް ހަސަން އަލީ ސޮއި ކުރައްވާ ނެރުނު އެއް ސޮފްޙާގެ ބަޔާނުގައި ވަނީ “11 ނޮވެމްބަރ 2008 ވަނަ ދުވަހު އުފެދުނު ސަރުކާރު 11 ނޮވެމްބަރ 2013 ވަނަ ދުވަހުގެ 00:00 ފެށިގެން ސަރުކާރުގެ ޤާނޫނީ މުއްދަތު ހަމަވެފައިވުމުން އެސަރުކަރުގެ ދުސްތޫރިއްޔަތާއި، ޝަރުޢިއްޔަތު ގެއްލިފައިވާ ކަމަށް ކުޅުދުއްފުށީ ކައުންސިލުން ދެކޭ” ކަމަށެވެ.

އަދި ދިވެހިރާއްޖޭގެ ހުރިހާ ބާރު ތަކެއް ފެށިގެން އަންނަނީ ދިވެހި ރައްޔިތުންގެ ކިބައިންކަމަށް ރާއްޖޭގެ ޤާނޫނު އަސާސީ ގައި ބަޔާން ކޮށްފައި ވީހިނދު، 11 ނޮވެމްބަރ 2013 ވަނަ ދުވަހާ ހަމަ ރައީސުލްޖުމްހޫރިއްޔާގެ މަގާމަށް ބޭފުޅަކު އައްޔަން ނުކުރެއްވިއްޖެނަމަ، ރައީސުލްޖުމްހޫރިއްޔާކަމުގެ މަގާމަށް އަލުން މީހަކު އިންތިހާބު ކުރެއްވެންދެން އެމަގާމުގެ މަސްއޫލިއްޔަތުތަކާއި ވާޖިބުތައް އަދާކުރާނީ ރައްޔިތުންގެ މަޖިލީހުގެ ރައީސް ކަމަށް އެ ބަޔާނު ގައި ވެއެވެ.

އަދި ރައްޔިތުންގެ މަޖިލީހުގެ ރައީސް އެކަމާ ހަވާލުވެވެން ނެތްނަމަ އެމަގާމާއި ހަވާލު ވަނީ ރައްޔިތުންގެ މަޖިލީހުގެ ނައިބު ރައީސް ކަމަށާއި މަޖިލީހުގެ ނައިބު ރައީސަށް ރައީސުލްޖުމުހޫރިއްޔާގެ މަގާމާ ހަވާލުވެވެން ނެތްނަމަ، އެކަމާ ހަވާލުވާނީ ރައްޔިތުންގެ މަޖިލީހުން ފާސްކުރާ ގަރާރަކުން ހޮވާ އެމަޖިލީހުގެ މެމްބަރަކު ކަމަށެވެ. އަދި ރައްޔިތުންގެ މަޖިލީހުން ފާސްކޮށްފައިވާ ގަރާރުގައިވާ ގޮތުން ރައީސްޖުމްހޫރިއްޔާގެ މަސްއޫލިއްޔަތުތައް ރައްޔިތުންގެ މަޖިލީހުގެ ރައީސް އާ ހަވާލުކުރުމަށް ގޮވާލާކަމަށެވެ.

11 ނޮވެމްބަރުގެ ކުރިން ރައީސަކު އިންތިހާބު ނުކުރެވިއްޖެ ނަމަ، މިހާރު އޮތް ސަރުކާރު ދެމިއޮންނާނެ ކަމަށް ސުޕްރީމް ކޯޓުން ވަނީ ހުކުމް ކޮށްފަ އެވެ. އެހެންކަމަށް ވުމާއެކު ނޮވެމްބަރު 11 ވަނަ ދުވަސް ފެށެން ކުޑަ އިރުކޮޅަކަށް ވެފައި ވަނިކޮށް މިހާރުގެ ރައީސުލްޖުމްހޫރިއްޔާ ވަނީ އިންތިހާބުގެ ދެވަނަ ބުރު ނިމެންދެން ރައީސް ކަމުގައި ދެމިހުންނަވާނެ ކަމުގައި އިއުލާނު ކޮށްފަ އެވެ.