ބައިނަލްއަގްވާމީ ހަކުރު ބަލީގެ ދުވަސް ފާހަގަކުރުމުގެ ގޮތުން ހާއްސަ ހަވީރެއް މާދަމާ ބާއްވަނީ

ބައިނަލްއަގްވާމީ ހަކުރު ބަލީގެ ދުވަސް ފާހަގަކުރުމުގެ ގޮތުން ހާއްސަ ހަވީރެއް މާދަމާ އޮންނާނެ ކަަމަށް ކުޅުދުއްފުށީ ރީޖަނަލް ހޮސްޕިޓަލުން ހާމަކޮށްފި އެވެ.

ދުނިޔޭގެ ފެންވަރުގައި ފާހަގަކުރާ ހަކުރު ބަލީގެ ދުވަހާ ދިމާކޮށް ކުޅުދުއްފުށީ ރީޖަނަލް ހޮސްޕިޓަލުން އިންތިޒާމް ކޮށްގެން ހަކުރު ބައްޔާމެދު ރައްޔިތުން އަހުލުވެރިކުރުވުމުގެ މަގުސަދުގައި  ބާއްވާ މި ހަވީރު އޮންނާނީ މާދަމާ އަމީރު އަމީން ސްކޫލު ސަރަހައްދުގަ އެވެ.

މާދަމާގެ 4 އިން 6 އަށް ކުރިއަށްދާ މި ހަވީރުގައި ހަކުރުބައްޔާ ބެހޭ މައުލޫމާތު ފޯރުކޮށްދިނުމުގެ އިތުރުން، ލޭގެ ޕްރެޝަރު ބަަލައި ދިނުމާއި، ހަށިގަނޑުގައި ސަރުބީ ހުރި މިންވަރު ބަލައިދިނުން ކުރިއަށްދާނެއެވެ. އަދި މީގެ އިތުރުން އިސްކޮޅާއި އަޅާ ބަލާއިރު ބަރުދަން ހުންނަންވީ މިންވަރު ބަލާދިނުމާއި ހަށިގަނޑު ދުޅަހެޔޮކޮށް ބެހެއްޓުމަށް ކުރެވިދާނެ ކަސްރަތުތައް ދަސްކޮށްދިނުންވެސް މި ހަވީރުގައި ކުރިއަށްދާނެ ކަމަށް ކުޅުދުއްފުށީ ރީޖަނަލް ހޮސްޕިޓަލުގެ ޕަބްލިކް ހެލްތު ޔުނިޓުން ހާމަކުރެއެވެ.

“ޑައިބެޓީސް – ޕްރޮޓެކްޓް އަވަރ ފިއުޗަރ” މިޝިއާރުގެ ދަށުން މިއަހަރު ފާހަގަ ކުރާ ހަކުރު ބަލީގެ ދުވަހުގެ ހަވީރުގައި ވީހާ ގިނަ ޒުވާނުންނާއި އުމުރުން ދުވަސްވީ މީހުން ބައިވެރިވުމަށް ހޮސްޕިޓަލުން އިލްތިމާސް ކުރައްވަ އެވެ.

ހަކުރުބަލީގެ ދުވަސް ފާހަގަ ކުރުމުގެ ގޮތުން މިފަދަ ހަވީރެއް މިދިޔަ އަހަރުވެސް ވަނީ ބާއްވާފައެވެ. ބައިނަލް އަޤްވާމީ ހަކުރުބަލީގެ ދުވަހަކީ ނޮވެމްބަރު މަހުގެ14 ވަނަ ދުވަހެވެ.