ޑީއާރުޕީގެ ލީޑަރު ކަމުން ތަސްމީނު އިސްތިއުފާ ދެއްވައިފި

ޑީއާރުޕީގެ ލީޑަރު ކަމުން އަހުމަދު ތަސްމީނު އަލީ މިއަދު އިސްތިއުފާ ދެއްވައިފި އެވެ.

ތަސްމީން އިސްތިއުފާ ދެއްވިކަން ހާމަ ކުރައްވާފައިވަނީ ކައުންސިލަށް ފޮނުއްވި ސިޓީއެއްގައެވެ. މަގާމުން އިސްތިއުފާ ދެއްވުމަށް ފަހު ތަސްމީން ނެރުއްވި ބަޔާނުގައި ވިދާޅުވީ ރައްޔިތުން އެދޭ ތަރައްގީ އާއި ކުރިއެރުން ހާސިލްކުރެވޭނީ އެމްޑީޕީއާ އެކު މަސައްކަތްކުރައްވައިގެން ކަމަށް ގަބޫލުކުރައްވާ ކަމަށާްއި މަގާމުން އިސްތިއުފާ ދެއްވީ އެ ހަގީގަތް ގަބޫލުކުރައްވައިގެން ކަމަށެވެ..

ތަސްމީން ވިދާޅުވީ 2008 ގެ ރިޔާސީ އިންތިހާބަށް ފަހު ޑީއާރުޕީ ނިކަމެތިވި ދަނޑިވަޅުގައި ޕާޓީގެ ކުރިމަގަށްޓަކައި ގިނަ މަސައްކަތްތަކެއް ކުރައްވާފައިވާނެ ކަމަށާއި ޕާޓީގެ ހިންގުމާ ހަވާލުވުމަށް ފަހު ވެވަޑައިގެންނެވި އެންމެ މުހިއްމު ވައުދަކީ، ކޮންމެ ފަދަ ގޮންޖެހުމަކާ ކުރިމަތިވެވަޑައިގެންނެވި ނަމަވެސް މި އަހަރުގެ ރިޔާސީ އިންތިހާބު ނިމެންދެން ލީޑަޝިޕްގައި ދެމި ހުރެ ޕާޓީގެ ކުރިމަގަށް މަސައްކަތްކުރެއްވުން ކަމަށެވެ.

ތަސްމީނު އިސްތިއުފާ ދެއްވުމާއި ގުޅިގެން މިއަދު ކުރިއަށްގެންދިޔަ އެޕާޓީގެ ކައުންސިލް ބައްދަލުވުން ހޫނުވެ ފަހުން ވަނީ މެދުކަނޑާލާފައެވެ.

ޑީއާރުޕީގެ ކައުންސިލުގައި 23 މެމްބަރުން ތިއްބަވާ ނަމަވެސް 13 މެމްބަރުންނާއި އެކު ބޭއްވި މި ބައްދަލުވުން މެދުކަނޑާލާފައިވަނީ ބައްދަލުވުން ހޫނުވެ ކޯރަމް ގެއްލުމުންނެވެ.

ޑީއާރުޕީގެ އަސާސީ ގަވާއިދުގައި ބުނެފައިވާ ގޮތުގައި ލީޑަރު އިސްތިއުފާ ދެއްވާތާ 72 ގަޑިއިރުގެ ތެރޭގައި ވަގުތީ ރައީސަކު އައްޔަން ކުރަން ޖެހޭނެއެވެ. އަދި 60 ދުވަހުގެ ތެރޭގައި އާ ލީޑަރަކު އިންތިހާބު ކުރަން ޖެހޭނެއެވެ. އެހެން ކަމުން މިކަންކަން ހަމަޖެއްސުމަށް މިއަދު ހަވީރު ކައުންސިލް ބައްދަލުވުމެއް ބޭއްވުމަށް ވަނީ ހަމަޖެހިފައެވެ.