ކުޅުދުއްފުށީ ހޮސްޕިޓަލުގައި ހުޅުވި ޑައިލިސިސް ސެންޓަރުގެ ހިދުމަތް ދޭން ފަށައިފި

ކުޅުދުއްފުށީ ހޮސްޕިޓަލުގައި ހުޅުވި ޑައިލިސިސް ސެންޓަރުގެ ހިދުމަތް ދޭން ފަށައިފި އެވެ.

މިނޫހަށް މައުލޫމާތު ދެއްވަމުން ހޮސްޕިޓަލުގެ އެކްޓިން ޑެޕިއުޓީ މެނޭޖަރ މުހައްމަދު ހަސަން ވިދާޅުވީ ޑައިލިސިސް ސެންޓަރުގެ ޚިދުމަތް ދިނުމަށް މިދިޔަ ހޮނިހިރު ދުވަހު ފަށާފައިވާނެ ކަމަށާއި މިހާތަނަށް ސެންޓަރުގެ ޚިދުމަތް ލިބިގަތުމަށް ރަޖިސްޓަރ ކޮށްފައިވަނީ އެންމެ ބަލިމީހެއް ކަމަށެވެ. އެހެން ނަމަވެސް އިތުރު ބަލިމީހުން ރަޖިސްޓަރ ކުރުމުގެ ކަންތައް ކުރިއަށް ގެންދާނެ ކަމަށް ޤަބޫލު ކުރައްވާ ކަމަށްވެސް ވިދާޅުވި އެވެ.

ކުޅުދުއްފުށީ ހޮސްޕިޓަލުގައި ހުންނަ ޑައިލިސިސް ސެންޓަރުގައި މިވަގުތު ހުރީ ޑައިލިސިސް 3 މެޝިނާއި 3 އެނދު ކަމަށް ވީނަމަވެސް ވަރަށް އަވަހަށް އިތުރު މެޝިން ލިބިގެންދާނެ ކަމަށް ހޮސްޕިޓަލުން މައުލޫމާތު ދެއެވެ.

މިދިޔަ މާރޗް މަހުގެ ތެރޭގައި 2 ޑައިލެސިސް މެޝިން ކުޅުދުއްފުށީ ހޮސްޕިޓަލަށް ހަދިޔާ ކޮށްފައިވަނީ ރާއްޖޭގައި މެޑިކަލް ސަޕްލައި ވިއްކާ ކުންފުންޏެއްކަމުގައިވާ މެޑިކޮމް ޕްރައިވެޓް ލިމިޓެޑްގެ ފަރާތުންނެވެ.

ކިޑްނީ ބަލި ހުންނަ މީހުން ބަލީގެ ވަކި ހިސާބަކުން ޑައިލިސިސް މެޝިންގެ ޚިދުމަތް ހޯދަން ޖެހޭއިރު ކުޅުދުއްފުށީ ރީޖަނަލް ހޮސްޕިޓަލުގައި ޤާއިމްކުރެވިފައިވާ ޑައިލިސިސް ސެންޓަރުގައި ރަޖިސްޓްރީ ކުރެވޭ ކޮންމެ ބަލިމީހަކަށްވެސް އެންމެ ފުރިހަމައަށް ފަރުވާ ދެވޭނެ ކަމަށް މުހައްމަދު ހަސަން ވިދާޅުވި އެވެ.

ކުޅުދުއްފުށީ ރީޖަނަލް ހޮސްޕިޓަލުގައި ޤާއިމު ކުރެވިފައިވާ ކިޑްނީ ބަލިތަކަށް ފަރުވާދޭ ޑައިލިސިސް ސެންޓަރު ރަސްމީކޮށް ހުޅުވާފައިވަނީ މި އަހަރުގެ މެއި މަހުގެ 4 ވަނަ ދުވަހު ކުރީގެ ރައީސް މުހައްމަދު ވަހީދު ކުޅުދުއްފުއްޓަށް ކުރެއްވި ދަތުރުފުޅުގައެވެ.