ކްރައުން ކޮލިޓީ އެވޯޑް ވިލާ ކޮލެޖަށް ލިބިއްޖެ

ބިޒްނަސް އިނިޝިއޭޓިވް ޑައިރެކްޝަންސްގެ ފަރާތުންދޭ ކްރައުން ކޮލިޓީ އެވޯޑް ވިލާކޮލެޖަށް ލިބިއްޖެ އެވެ.

މި އެވޯޑަކީ އެކޮލެޖުން ދެމުން ގެންދާ ޚިދުމަތް ތަކުގައި ބައިނަލްއަޤްވާމީ އައި.އެސް.އޯ ގަބޫލު ކުރާ ފެންވަރު ހިފެހެއްޓުމުގެ ގޮތުން ކިޔު.ސީ ވަން ހަންޑްރެޑްގެ ދަށުން ކުރަމުން ގެންގޮސްފައިވާ މަސައްކަތްތަކުގެ އަގުވަޒަންކުރުމުގެ ގޮތުން ދީފައިވާ އެވޯޑެކެވެ.

ޕްލެޓިނަމް ކެޓަގަރީގެ މި އެވޯޑް ވިލާ ކޮލެޖާ ޙަވާލުކުރުން އޮތީ މި ނޮވެމްބަރ މަހުގެ 24 ވަނަ ދުވަހު އިނގިރޭސި ވިލާތުގެ ލަންޑަނުގެ ގޯމަން ޓަވަރ ހޮޓަލުގައި ބޭއްވުނު 25 ވަނަ ބައިނަލް އަޤްވާމީ ކޮލިޓީ ކޮންވެންޝަންގެ ޖަލްސާގައެވެ. ވިލާ ކޮލެޖުގެ ފަރާތުން މި އެވޯޑާ ޙަވާލުލެއްވީ ކޮލެޖުގެ ޑިރެކްޓަރ އެންޓަރޕްރައިޒް އެންޑް ޑިވެލޮޕްމަންޓް އަލްފާޟިލް މުޙައްމަދު ޢަޒީމް ހާރޫނެވެ.

ޕްލެޓިނަމް ކެޓަގަރީގެ މި އެވޯޑް ފަރުމާ ކޮށްފައިވަނީ ތަފާތު ދާއިރާތަކުން ޚިދުމަތް ކުރަމުން ގެންދާ ޚިދުމަތްތެރީން އެ ޚިދުމަތްތައް ދެމުން ގެންދާއިރު ކޮލިޓީ ހިފެހެއްޓުމުގެ ސަގާފަތެއް ގެންގުޅުމަށް ބާރު އެޅުމުގެ ގޮތުން ކަމަށާއި ކިޔު.ސީ ވަން ހަންޑްރެޑްގެ ދަށުން ޚިދުމަތުގެ ފެންވަރު ވަޒަންކުރާ މި އެވޯޑަކީ އޭޝިޔާ ޕެސިފިކް ކޮލިޓީ ކޮންޓްރޯލް ނެޓްވާކް (އޭ.ޕީ.ކިޔު.އެން) އިންވެސް ގަބޫލު ކުރާ އެވޯޑެއް ކަމަށް ވިލާ ކޮލެޖުން ހާމަކުރެއެވެ.

ވިލާ ކޮލެޖަށް މި އެވޯޑް ލިބުމާ ގުޅިގެން ޚިދުމަތުގެ ފެންވަރު އިތުރަށް ހަރުދަނާ ކުރުމަށް ބާރު އެޅުމުގެ ގޮތުން އެއްބަސްވުމެއްގައި އިއްޔެ ވަނީ ސޮއިކޮށްފައެވެ. މި އެއްބަސްވުމުގައި ވިލާ ކޮލެޖްގެ ރެކްޓަރ ޑޮކްޓަރ އަޙުމަދު އަންވަރު ސޮއި ކުރައްވައި، އެކަން ހިންގައި ބެލެހެއްޓުން ވިލާ ކޮލެޖުގެ އިންސްޓިޓިއުޓް ފޮރ އެކަޑަމިކް ޑެވަލޮޕްމަންޓާ ވަނީ ޙަވާލު ކޮށްފައެވެ.

ކޮލިޓީ ކްރައުން ވަން ހަންޑްރެޑް ގެ ދަށުން ދެވުނު މި އެވޯޑް ވިލާ ކޮލެޖަށް ލިބިފައިވަނީ 74 ޤައުމުގެ ތެރޭގައި ވިލާ ކޮލެޖު ހޮވިގެންނެވެ. މީގެ ކުރިން މި އިނާމު ލިބިފައިވާ ޔުނިވަރސިޓީތަކާއި ކުންފުނިތަކުގެ ތެރޭގައި މެލޭޝިޔާގެ ލިމް ކޮކްވިންގ ޔުނިވަރ ސިޓީއާއި، ޔުނިޓެން ޔުނިވަރސިޓީ އަދި ވޮލްމަޓް ކުންފުނި ފަދަ ތަންތަންވެސް ހިމެނެއެވެ.