ކައުންސިލަށް ކެންޑިޑޭޓުން ހޮވުމަށް އެމްޑީޕީން ބާއްވާ ޕްރައިމަރީގެ ވޯޓުނެގުން އުތުރުގެ ތިން ރަށެއްގައި ކުރިއަށް އެބަދޭ

ލޯކަލް ކައުންސިލަށް ކެންޑިޑޭޓުން ހޮވުމަށް އެމްޑީޕީން ބާއްވާ ޕްރައިމަރީގެ ވޯޓުނެގުން އުތުރުގެ ތިން ރަށެއްގައި ފެށިގެން ކުރިއަށް އެބަދެ އެވެ.

އެގޮތުން ކުޅުދުއްފުއްޓާއި ހއ. ދިއްދޫ އަދި ހއ. އިހައްވަދޫގައި ވޯޓު ނެގުން މިއަދު ހެނދުނު 9 ޖެހިއިރު ފެށިގެން ކުރިއަށްދާ ކަމަށް އެ ދާއިރާ ތަކުން މައުލޫމާތު ދެ އެވެ.

ކުޅުދުއްފުށީގައި އެމްޑީޕީގެ މެމްބަރުގެ ގޮތުގައި 741 މީހުން ރަޖިސްޓަރީ ކުރެވިފައިވާއިރު ރަށު ކައުންސިލުގެ 7 ގޮނޑިއަށް 11 ކެންޑިޑޭޓުން ވާދަ ކުރެ އެވެ. އަދި އަތޮޅު ކައުންސިލުގެ ދެކުނު ދާއިރާގެ 2 ގޮނޑި އަށް 3 ކެނޑިޑޭޓަކުން ވާދަ ކުރައްވަމުންނެވެ. އެހެން ނަމަވެސް އަތޮޅު ކައުންސިލުގެ އުތުރު ދާއިރާގެ 2 ގޮނޑިއަށް 2 ބޭފުޅުން ކުރިމަތި ލުމުން އެ ދެބޭފުޅުން ވަނީ އޮޓަމެޓިކުން ހޮވިފައެވެ.

ދިއްދޫ ގައި އެމްޑީޕީގެ މެމްބަރުގެ ގޮތުގައި ދަފްތަރު ކުރެވިފައިވަނީ 485 މެމްބަރުންނެވެ. 7 ގޮނޑިއަށް 15 ކެނޑިޑޭޓަކުން ދަނީ ވާދަ ކުރަމުންނެވެ. އެއީ ރަށު ކައުންސިލުގެ 5 ގޮނޑިއަށް ވާދަކުރައްވާ 12 ކެނޑިޑޭޓުންނާއި އަތޮޅު ކައުންސިލުގެ 2 ގޮނޑިއަށް ވާދަކުރައްވާ 3 ކެނޑިޑޭޓުންނެވެ.

އިހަވަންދޫގައި އެމްޑީޕީ ދަފްތަރުގާ ޖުމްލަ 548 މެމްބަރު ތިބޭ އިރު އެގޭތެރެއިން 24 މެމްބަރަކު ވޯޓުލުމަށް ރަޖިސްޓްރީ ކޮށްފައިވަނީ މާލޭގައެވެ. އަތޮޅު ކައުންސިލުގެ ގޮނޑިއަށް 2 މެމްބަރަކު ކުރިމަތިލާފައި ވުމުގެ ސަބަބުން އެ ދެބޭފުޅުން ވަނީ އިންތިހާބަކާ ނުލާ އޮޓަމެޓިކުން ޕްރައިމަރީއިން ހޮވިފަ އެވެ. އެއީ މިހާރު ވެސް ހއ އަތޮޅު ކައުންސިލުގެ 2 ގޮނޑި ފުރުވަމުން ގެންދަވާ 2 ބޭފުޅުން ކަށްމަވާ މުހައްމަދު ރަޝީދާއި އަބުދުﷲ ހުސެއިނެވެ. އިހަވަންދޫގެ ރަށު ކައުންސިލުގެ 5 ގޮނޑިއަށް 8 ކެނޑިޑޭޓަކުން ދަނީ މި ޕްރައިމަރީގަ ވާދަ ކުރަމުންނެވެ.

އެމްޑީޕީގެ ޕްރައިމަރީގައި މި ތިން ރަށުން ގިނަ މެމްބަރުންތަކެއް މިއަދުގެ މެންދުރާ ހަމަ އަށް ވަނީ ވޯޓު ލާފަ އެވެ. މިއަދުގެ 4:00 ވޯޓުލުން ކުރިއަށްދާނެ ކަމަށް އެމްޑީޕީ މައުލޫމާތު ދެ އެވެ.