“އައުޓުސްޓޭންޑިން ކޮމިއުނިޓީ އިނިޝިއޭޓިވް އެވޯޑު” ބީއެމްއެލް އަށް ލިބިއްޖެ

އިންޓަރނޭޝަނަލް އެވޯޑެއް ކަމަށްވާ “އައުޓުސްޓޭންޑިން ކޮމިއުނިޓީ އިނިޝިއޭޓިވް އެވޯޑު” ބޭންކް އޮފް މޯލްޑިވްސްގެ ދޯނި ބޭންކިންގ ޚިދުމަތަށް ލިބިއްޖެ އެވެ.

ގްލޯބަލް ބިޒްނަސް އެކްސެލެންސް އެވޯޑުގެ ސީއެސްއާރު ކެޓަގަރީގެ މި އެވޯޑު ބީއެމްއެލް އަށް ލިބިފައިވަނީ ބެންކުގެ ބްރާންޗު ތައް ނުހުންނަ ރަށްރަށުގެ ރައްޔިތުންނަށް ފޯރުކޮށްދެމުންގެންދާ ޚިދުމަތްތަކުގެ އަގު ވަޒަން ކުރުމުގެ ގޮތުންނެވެ.

ބޭންކުގެ މި ޚިދުމަތުގެ ތެރެއިން ބޭންކުގެ ދޯނީގައި ބްރާންޗު ނުހުންނަ ރަށްރަށަށް ޒިޔާރަތްކޮށް އެކައުންޓު ހުޅުވުމާއި އެކައުންޓަށް ފައިސާ ޖަމާކޮށްދިނުމާއި ފައިސާނަގާ،  ލޯނު ފައިސާ ބަލައިގަތުންފަދަ ޚިދުމަތްތައް ރައްޔިތުންނަށް ދެމުން ގެންދެއެވެ. އަދި މީގެ އިތުރުން ކަސްޓަމަރުންނަށް ޑެބިޓު އަދި ކްރެޑިޓު ކާޑު ހަވާލުކުރުމާއި 65 އަހަރުން މަތީގެ މީހުންނަށް ލިބެ ޕެންޝަން ފައިސާ ވެސް މިފަދަ ޒިޔާރަތްތަކުގައި އޭގެ ހައްގުވެރިންނަށް ހަވާލުކޮށްދެއެވެ.

ދޯނި ބޭންކިންގ ޚިދުމަތަކީ މީގެ 21 އަހަރު ކުރިން ދޭން ފަށާފައިވާ ޚިދުމަތެކެވެ. މިގޮތުން މިދިޔަ އަހަރު އެކަނިވެސް ބެންކު ދޯނީގައި 2000އަށްވުރެ ގިނަ ދަތުރު ކޮށްފައިވާކަމަށް އެފަރާތުން ހާމަކުރެއެވެ.

އިނގިރޭސި ވިލާތުގެ އެވޯޑްސް އިންޓެލިޖެންސް އިން އިންތިޒާމުކުރާ ގްލޯބަލް ބިޒްނަސް އެކްސެލެންސް އެވޯޑަކީ ވިޔަފާރި އާއި ޚިދުމަތުގެ ދާއިރާއިން ދުނިޔޭގެ ފާހަގަ ކޮށްލެވޭ ކުންފުނިތަކަށްދޭ އެވޯޑެކެވެ.