ހޯރަފުށީގައި އުމުރުން ދުވަސްވީ މީހަކަށް ތޫނު އެއްޗަކުން ހަމަލާދީފި

ތޫނު އެއްޗަކުން ހަމަލާދީ އުމުރުން ދުވަސްވީ ފިރިހެނަކު ރޭ ހއ. ހޯރަފުށީގައި ޒަޚަމްކޮށްލައިފި އެވެ.

ފުލުހުންގެ މީޑިޔާއިން ބުނީ ރޭ 03:30 ހާއިރު މަހަށް ދާން ނުކުމެ އުޅެނިކޮށް ތޫނު އެއްޗަކުން ހަމަލާދީ ޒަޚަމްކޮށްލާފައިވަނީ  53 އަހަރުގެ ފިރިހެނަކަށް ކަމަށެވެ. މި ހަމަލާގައި އޭނާގެ ބުރަކަށީގެ 2 ތަނަކަށް ގެއްލުން ލިބިފައިވާ ކަމަށާއި އޭނާއަށް ހއ. ދިއްދޫ ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ހާމަކުރެއެވެ.

ފުލުހުން ބުނީ މަހަށް ދާން ނުކުމެ އުޅުނު މި މީހާއަށް ތޫނު އެއްޗަކުން ހަމަލާދީފައިވަނީ މޫނު ނިވާކޮށްގެން ތިބި ބަޔެއް ކަމަށާއި ހަމަލާ ދިނުމަށްފަހު އެމީހުން ފިލާފައިވާ ކަން އެނގިފައިވާ ކަމަށެވެ.

މި މައްސަލައާއި ގުޅިގެން 3 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށާ މި މީހުންގެ ތެރޭގައި ހިމެނެނީ 21 އަހަރުގެ ފިރިހެނަކާއި 22 އަހަރުގެ ފިރިހެނެއްގެ އިތުރުން 27 އަހަރުގެ ފިރިހެނެއް ކަމަށްވެސް ފުލުހުންގެ މީޑިޔާއިން މައުލޫމާތުދެއެވެ.

މިމައްސަލައިގާ ޒަޚަމްވެފައިވަނީ ފިނިހިޔާގެ، އަބްދުލް ބާރީ ކަމަށާއި މައްސަލަ ހޯރަފުށީ ޕޮލިސް ސްޓޭޝަނުން ތަހުގީގު ކުރަމުންދާތީ އިތުރު މައުލޫމާތު ހާމަކުރެވެން ނެތް ކަމަށް ހޯރަފުށީ ކައުންސިލް އިދާރާއިން ހާމަކުރެއެވެ.

މީގެ ކުރިން ހޯރަފުށީގައި ވަނީ އުމުރުން ދުވަސްވީ މީހަކަށް ހަމަލާދީ މަރާލާފައި އެވެ.