ހަނިމާދޫގައި ސިޓީ ހޮޓާ އެޅުމަށް 50 އަހަރަށް ބިމެއް ކުއްޔަށް ދީފި

ހދ ހަނިމާދޫގައި ސިޓީހޮޓަލެއް އެޅުމަށް ހަމަޖެހިފައިވާ 3 ބިމުގެ ތެރެއިން ބިމެއް 50 އަހަރަށް ނޫމަޑި ރިސޯޓް ޕްރައިވެޓް ލިމިޓެޑަށް ކުއްޔަށް ދީފި އެވެ.

ހަނިމާދޫގައި ސިޓީ ހޮޓާ ތަރައްގީ ކުރާނީ ނޫމަޑި ކުންފުންޏާއި އައިލެންޑް އެކްސްޕާޓްއާ ގުޅިގެންނެވެ. 120 އެނދުގެ ހޮޓަލެއް އެޅުމަށް 50 އަހަރަށް ބިން ކުއްޔަށް ދީފައި ވަނީ އަކަފޫޓަކަށް 5.32 ރުފިޔާގެ ރޭޓުންނެވެ. ނަމަވެސް ކުއްޔަށް ދިން ބިމުގެ ސައިޒު ކައުންސިލުން ވަނީ ސާފުވާގޮތް ނުވެފައެވެ.

މިނޫހަށް މައުލޫމާތު ދެއްވަމުން ހަނިމާދޫ ކައުންސިލުގެ ނައިބު ރައީސް ވިދާޅުވީ ކުއްޔަށް ދީފައިވީ ނަމަވެސް ބައެއް ސަބަބުތަކާހުރެ އެގްރީމެންޓުގައި އަދި ސޮއި ނުކުރާ ކަމަށެވެ. އެހެން ނަމަވެސް ސިޓީ ހޮޓާ އެޅުމުގެ މަސައްކަތް މިހާރު ކުރަން ފަށާފައިވަނީ އަވަހަށް ނިންމުމުގެ މަގުސަދުގައި ކަމަށާއި އެމަސައްކަތް ކުރަނީ ނޫމަޑި ކޮމްޕެނީ އާއި އައިލެންޑް އެކްސްޕާޓު ގުޅިގެން ކަމަށެވެ.

ނައިބު ރައީސް ވިދާޅުވީ އެސަރަހައްދުގައި ހުރި ރުއްގަހަށް އެއްވެސް ގެއްލުމެއް ލިބިގެން ނުދާނެ ކަމަށާއި އެތަކެއްޗަށް ބަދަލު ދިނުމުގެ ކަންކަން ކުރިއަށްދާކަމަށެވެ.

“ބައެއް ރައްޔިތުންގެ ފަރާތުން ޝަކުވާ ލިބިފަ އެބަހުރި ރުއްގަހަށް ބަދަލު ދިނުމާ ބެހޭގޮތުން. އެފަރާތްތަކަށް ކުރިންވެސް ޖަވާބު އަރުވާފަ ވާނީ ކަންއޮތްގޮތް. އިތުރަށް ޖަވާބުދާރީ ވާން ޖެހޭ ކަމަކަށް ޤަބޫލެއް ނުކުރަން.” ނައިބު ރައީސް ވިދާޅުވި އެވެ.

ހަނިމާދޫގައި ސިޓީ ހޮޓަލެއް ތަރައްގީ ކުރުމުގެ ސަބަބުން ޓޫރިސްޓުންގެ މަންޒިލަކަށް އެތަން ވެގެން ދިޔުމުން ރަށުގެ ގިނަ ބަޔަކަށް ވަޒީފާގެ ފުރުސަތު ލިބިގެންދާނެ ކަމަށްވެސް އޭނާ ވިދާޅުވި އެވެ.

ހަނިމާދޫގެ އުތުރު ކޮޅުގައި ސިޓީ ހޮޓާ އަޅާ ސަރަހައްދަކީ ރަށުގެ ރައްޔިތުން މޫދަށް ދިއުމަށާއި މަސް ހިފުމަށާއި އިތުރު ގޮތްގޮތުން މުނިފޫހި ފިލުވުމަށް ދާ ސަރަހައްދަކަށް ވާތީ، އެސަރަހައްދު ބަޔަކަށް ކުއްޔަށް ދިނުމާ ދެކޮޅަށް ބައެއް ރައްޔިތުން ދަނީ ވާހަކަ ދައްކަމުންނެވެ. މިގޮތުން ރައްޔިތުންގެ ހިޔާލު ހޯދުމަށް ކައުންސިލުން ބޭއްވި ބައްދަލުވުމުގައި ވެސް ރައްޔިތުން ވަނީ އެކަމަށް ދެކޮޅު ހަދާފަ އެވެ.

މި ސިޓީ ހޮޓާ އަޅާ ސަރަހައްދަށް ރައްޔިތުންގެ ބަޔަކު މަސްހިފަން ނުވަތަ އެނޫންވެސް ބޭނުމެއްގައި ދާނެ ކަމަށް ލަފާ ނުކުރެވޭ ކަމަށާއި ބިމެއް ކުއްޔަށް ދިނުމަށްފަހު އެ ބިމަކީ ކުއްޔަށް ހިފި ފަރާތުގެ ތަނެއްކަން ނައިބު ރައީސް ފާހަގަ ކުރެއްވި އެވެ.

ދިވެހިރާއްޖޭގެ ޓޫރިޒަމާބެހޭ ޤާނޫނުގެ 8 ވަނަ މާއްދާގެ ދަށުން ޓޫރިޒަމް މިނިސްޓްރީގެ ހުއްދައާއެކު އެ ރަށު ކައުންސިލުން ސިޓީ ހޮޓާ ތަރައްގީކުރުމަށް ބީލަމަށް ހުޅުވާލާފައިވަނީ މިއަހަރުގެ ޖުލައި މަހުގެ ތެރޭގައެވެ.