ބަނޑުގައިވާ ދަރިފުޅު ވައްޓާލުން ހުއްދަ ފަސް ހާލަތެއް ފިގުހު އެކަޑަމީން ކަނޑައަޅައިފި

ބަނޑުގައިވާ ދަރިފުޅު ވައްޓާލުން (އެބޯޓުކުރުން) ހުއްދަވާ ފަސް ހާލަތެއް ރާއްޖޭގެ ފިގުހު އެކަޑަމީން ކަނޑައަޅައި މިދިޔަ ބުދަ ދުވަހު ފަތުވާއެއް ނެރެފި އެވެ.

“ނުޠުފާ ނައްތާލުމާއި ހައްޔަރުން ނައްޓުވައިލުމާއި ދަރި ވައްޓައިލުމާއި ބެހޭ” ގޮތުން ނެރެފައިވާ މި ފަތުވާއަކީ މިނިސްޓްރީ އޮފް އިސާލާމިކް އެފެއާޒް މެދުވެރިކޮށް، ފިގުހު އެކަޑެމީއަށް ހުށަހަޅާފައިވާ ދެ މައްސަލައަކާއި ގުޅިގެން ނެރުއްވާފައިވާ ފަތުވާއެކެވެ.

މި ފަތުވާގައިވާގޮތުން ކާވެނި ހެޔޮނުވާ ފިރިހެނަކު، އެފަދަ އަންހެނަކާ އެކު ގަދަކަމުން ޖިންސީ ގުޅުން ހިންގައި އެ އަންހެނާގެ ޢިއްފަތްތެރިކަމަށް އަރައިގަންފިނަމަ ދަރިވައްޓާލުން ހުއްދައެވެ. އަދި ކާވެނި ހެޔޮވާ ފިރިހެނަކު، އެފަދަ އަންހެނަކާ އެކު ގަދަކަމުން ޖިންސީގުޅުން ހިންގައި، އެ އަންހެނާގެ ޢިއްފަތްތެރިކަމަށް އަރައިގަންފިނަމަ ދަރިވައްޓާލުމާއި، ހަށިގަނޑު ބަލިކަށި، ނުވަތަ ބަލިވެ އިނދެ ވިހެއުމަށް އަދި އަހްލުވެރިވެފައި ނުވާ ކުއްޖަކާ އެކު ފިރިހެނަކު ގަދަކަމުން ޖިންސީގުޅުން ހިންގައި، އެ އަންހެނާގެ ޢިއްފަތްތެރިކަމަށް އަރައިގަންފިނަމަ ދަރިވައްޓާލުން ވެސް ހުއްދައެވެ.

މީގެ އިތުރުން ކުއްޖާގެ ހަށިގަނޑުގައި، ނުވަތަ ސިކުނޑީގައި، ދާއިމީ ބޮޑު އުނިކަމެއް ހުރެދާނެ ފަދަ ބޮޑު ބައްޔެއް ޖެހިފައިވާ ކުއްޖެއްކަން، ޑަކްޓަރީގޮތުން ޔަޤީންވާ އިރު، އެއީ ބޭހަކުން ނުވަތަ ފަރުވާއަކުން ފަސޭހަ ކުރެވިދާނެ ކަމެއްކަމުގައި ނުވާނަމަ ދަރިވައްޓާލުން ހުއްދަ ކަމަށްވެސް މި ފަތުވާގައި ވެއެވެ. އަދި މާބަނޑު އަންހެނަކު ބަލިވެއިންތާ 120 ދުވަސްވުމަށްފަހު، ވިހެއުމާ ހަމަޔަށް ވެސް، އެ އަންހެނާގެ ފުރާނަޔަށް ނުރައްކާވާ ޙާލަތެއް މެދުވެރިވެއްޖެނަމަ، ހައްޔަރުން ނައްޓުވައިލުން ހުއްދަކަމުގައި މި ފަތުވާގައި ބުނެއެވެ

އެ އެކަޑަމީގެ އަށް ބޭފުޅަކު ސޮއިކުރައްވައި ނެރެފައިވާ އެ ފަތުވާގައިވާ ގޮތުން އަންހެން މީހާގެ ރަހިމުގައި އުފެދޭ ދަރިފުޅު 120 ދުވަސް ކުރިން އެބޯޓްކުރުމަކީ ހުއްދަ ކަމެކެވެ.