ޔޫކޭގައި އަންހެނުންގެ ދެބައިކުޅަ އެއްބައި މީހުންނަކީ ދިގުމުއްދަތުގެ ސިއްހީ މައްސަލަ ދިމާވެފައިވާ މީހުން: ދިރާސާ

އިނގިރޭސިވިލާތުގައި އަންހެނުންގެ ދެބައިކުޅަ އެއްބައި މީހުންނަކީ ދިގުމުއްދަތުގެ ސިއްހީ މައްސަލަ ދިމާވެފައިވާ މީހުން ކަމަށް އެ ގައުމުގެ އެނުއަލް ހެލްތު ސާވޭ އިން ދައްކައިފި އެވެ.

8000ބޮޑެތި މީހުންނާއި 2000 ކުޑަކުދިން ބައިވެރިވި މި ސާވޭގެ 23 އިންސައްތަ މީހުންނަކީ ޑިޕްރެޝަން އަށް ހުށައެޅިފައިވާ މީހުން ކަމަށާއި 45 އިންސައްތަ މީހުންނަކީ ހިތުގެ ބައްޔާއި، ހަކުރު ބަލި، އަދި ނޭވާ ހިއްލުން ފަދަ ބަލިތައް ކުރިމަތިވެފައިވާ މީހުންކަމަށް ސާވޭގެ ރިޕޯޓުގައި ބުނެ އެވެ.

މިފަދަ ބަލިތައް ތަހައްމަލު ކުރަމުންދާ ފިރިހެނުންގެ އަދަދު އަންހެނުންނާ އަޅާބަލާއިރު ވަރަށް މަދެވެ. މިގޮތުން 16 އިންސައްތަ މީހުންނަށް ޑިޕްރެޝަން ފަދަ ބަލިތައް ދިމާވެފައިވާއިރު ދިގުމުއްދަތުން ރަނގަޅުކުރެވޭ ބަލިތައް ޖެހިފައިވަނީ 36 އިންސައްތަ މީހުންނަށެވެ.

މި ސާވޭގައި ބައިވެރިވި ފަރާތްތަކުގެ ތެރެއިން 25 އިންސައްތަ އަންހެނުން އާދަޔާ ހިލާފަށް ފަލަ ކަމަށް ދައްކާފައިވާއިރު މިކަމުގައި ފިރިހެނުންގެ އިންސައްތަ އަކީ 24 އެވެ. އަދި ކުޑަކުދިންގެ ތެރެއިން 14 އިންސައްތަ ކުދިން އާދަޔާ ހިލާފަށް ފަލަ ކަމަށްވެސް ދައްކާފައިވެ އެވެ.

ބްރިޓިޝް ހާރޓް ފައުންޑޭޝަންގެ ކާރޑިއަކް ނަރުހަކު ބުނީ ފިރިހެނުންނަށް ވުރެ ގިނަ އަންހެނުންނަށް ސިއްހީ ގިނަ މައްސަލަތައް ކުރިމަތި ވަނީ އެމީހުންގެ ހަރަކާތްތެރިކަން ކުޑަ ވުމުގެ ސަބަބުން ކަމަށާއި އަންހެނުންނަށާއި ކުޑަކުދިން ސިއްހަތަށް ހޭލުންތެރިކުރުވާ، ފަރުވާތެރި ވުމަށް އިތުރު މަސައްކަތްތަކެއް ކުރަން ޖެހިފައިވާ ކަމަށެވެ. -ޑެއިލީ މެއިލް-