ކުޅުދުއްފުށީ “އުސްގެ” ހުރި ބިމުގައި ހަދާފައި ހުރި އިމާރާތެއް ފަސް އަހަރު ދުވަހަށް ކުއްޔަށް ދީފި

ކުރީގެ “އުސްގެ” ހުންނަ ބިމުގައި ހަދާފައިހުރި އިމާރާތެއް އަމިއްލަ ފަރާތަކަށް ފަސް އަހަރުގެ މުއްދަތަށް ކުއްޔަދީފި އެވެ.

ކުޅުދުއްފުށީ ކައުންސިލް އިދާރާގެ ބެލުމުގެ ދަށުގައި ހުންނަ މި އިމާރާތަކީ ކުރީގެ “އުސްގެ” ހުންނަ އިމާރާތުގެ އެއްބައިގައި ހަދާފައިވާ އިމާރާތެކެވެ.

ކައުންސިލުން އެ އިމާރާތް ކުއްޔަށް ދިނުމަށްޓަކައި 4 ފަހަރަކު ވަނީ އިއުލާނު ކޮށްފަ އެވެ. އެގޮތުން ފުރަތަމަ އިއުލާނު ކުރި ތިން ފަހަރު އެއްވެސް ފަރާތަކުން ޝައުގުވެރިކަން ފާޅު ކޮށްފައިނުވާ ކަމަށް ކައުންސިލުން މައުލޫމާތު ދެ އެވެ. އެންމެ ފަހުން ކުރި އިއުލަނާ ގުޅިގެން 7 ފަރާތަކުން މައުލޫމާތު ސާފު ކުރިނަމަވެސް، ފޯމް ހުށަހަޅާފައިވަނީ އެންމެ ފަރާތަކުން ކަމަށް ވާތީ އެފަރާތަށް ކުއްޔަދިނީ ކަމަށް ކައުންސިލުގެ ރައީސް އަލީ ހަސަން ވިދާޅުވި އެވެ.

756  އަކަ ފޫޓުގެ އެއިމާރާތް ކުއްޔަދީފައިވަނީ މަހަކު 3629ރ. އަށް، ކުޅުދުއްފުށީ އެތެންސް، މުހައްމަދު އިބްރާހީމަށެވެ.

“އުސްގެ” އިމާރާތުގައި އެންމެ ފަހުން ހިންގާފައިވަނީ ކުޅިވަރު ސާމާނާއި ކައްކާ ގޭސް ވިއްކަމުން އައި “ސޭމް” ފިހާރަ އެވެ.

ކުޅުދުއްފުށީ “އުސްގެ” އަކީ މީގެ އެތައް އަހަރުތަކެއް ކުރިންވެސް ވަރަށް މުހިއްމު ތަނެއްގެ ގޮތުގައި ބެލެވެމުން އައި ތަނެކެވެ. ކުޅުދުއްފުށީގައި އެންމެ ފުރަތަމަ ޓެލެފޯނުގެ ހިދުމަތް ދެމުން އައީވެސް އުސްގެ އިމާރާތުގެ ބައެއްގައެވެ.