މުސްލިމުން އެހެން ދީންތަކުގެ ފައްޅިތަކަށް ޒިޔާރަތްކުރުން ހުއްދައެއް ނޫން: ފިޤުހު އެކަޑަމީ

އެހެން ދީންތަކަށް އަޅުކަންކުރެވޭ ތަންތަނާއި އެހެން ދީންތަކުގެ ޝިއާރުތައް ފާޅުކުރެވޭ ތަންތަނަށް މުސްލިމުން ޒިޔާރަތްކުރުމަކީ ހުއްދަ ކަމެއް ނޫން ކަމަށް ދިވެހިރާއްޖޭގެ ފިޤުހު އެކަޑަމީން ކަނޑައަޅައިފި އެވެ.

ފިޤުހު އެކަޑަމީން މިގޮތަށް ނިންމާފައިވަނީ “މުސްލިމުން ފައްޅިއަށް ޒިޔާރަތްކުރުމާއި ބެހޭ” ގޮތުން އިއްޔެ ނެރެފައިވާ ފަތުވާއެއްގައި އެވެ.

“ﷲ ސުބުޙާނަހޫ ވަތަޢާލާ ފިޔަވައި އެހެން ފަރާތްތަކަށް އަޅުކަންކުރެވޭ ތަންތަނާއި، އެހެން ދީންތަކުގެ ޝިޢާރުތައް ފާޅުކުރެވޭ ތަންތަނަށް މުސްލިމުން ޒިޔާރަތްކުރުމަކީ ހުއްދަކަމެއް ނޫންކަމަށެވެ. އެހެނީ، އިސްލާމީ ޝަރީޢާ ވަނީ ޝިރުކުގެ އެންމެހާ ދޮރުތައް ބަންދުކޮށް އަދި ޝިރުކަށް މަގުފަހިކޮށްދޭ އެންމެހާ ކަންތައްތައް މަނާކޮށްފައި ކަމަށެވެ. އަދި ކާފަރުން އަޅުކަންކުރާ ތަންތަނަށް ޒިޔާރަތްކުރުމުގެ ނަތީޖާއެއްގެ ގޮތުން އެބައިމީހުންގެ ބާޠިލު ޢަޤީދާއާ މެދުގައި މުސްލިމެއްގެ ހިތުގައި ރުހި ޤަބޫލުވުން އުފެދިދާނެތީއެވެ.” ފިޤުހު އެކަޑަމީން ނެރެފައިވާ ފަތުވާއާ ހަވާލާދީ އިސްލާމިކް މިނިސްޓްރީން ނެރެފައިވާ ބަޔާނުގައި ބުނެފައިވެއެވެ.

އާންމު އުޞޫލެއްގެ ގޮތުން މުސްލިމުން ޣައިރު ދީންތަކުގެ ފައްޅިތަކަށް ޒިޔާރަތްކުރުން ހުއްދަނޫން ކަމެއް ކަމުގައި ވީނަމަވެސް ބައެއް ހާލަތްތަކުގައި އެފަދަ ތަންތަނަށް ޒިޔާރަތް ކުރެވިދާނެ ކަމަށް އެކަޑަމީގެ ފަތުވާގައި ބުނެފައި ވެއެވެ.

އެގޮތުން އެފަދަ ފައްޅިތަކާއި ތަންތަނުގައިވާ ކުފުރުގެ އަމަލުތަކަށާއި ރަމްޒުތަކަށް ނުރުހުންތެރިވާ ހާލުގައި، ޢަޤީދާ ހަރުދަނާ މީހަކު ޢިލްމީ ބޭނުމަކަށްޓަކައި، ނުވަތަ ޝަރުޢީ ޟަރޫރަތަކަށްޓަކައި އެފަދަ ތަނަކަށް ޒިޔާރަތްކުރުން ކަމުގައި ވެސް ފަތުވާގައި ވެއެވެ.

ފިގުހު އެކަޑަމީގެ ފަތުވާގައި އިތުރަށް ބުނެފައިވަނީ، ހާއްސަކޮށް އެބައިމީހުންގެ ޢީދުތަކާއި ދީނީ މުނާސަބަތު ތަކުގައި އެތަންތަނަށް ޒިޔާރަތްކުރުމީ ހުއްދަވެގެންވާ ކަމެއް ނޫން ކަމަށެވެ.

އިސްލާމިކް މިނިސްޓްރީން މައުލޫމާތު ދޭ ގޮތުގައި މިއީ އިސްލާމީ ފިޤުހު އެކަޑެމީން މި އަހަރު ނެރެފައިވާ 7 ވަނަ ފަތުވާއެވެ.