ވަތަނިއްޔާ މޯލްޑިވްސްގެ ނަން އުރީދޫއަށް ރީބްރޭންޑްކޮށްފި

ރާއްޖޭގައި ފުޅާދާއިރާއެއްގައި މުވާސަތީ ހިދުމަތް ދެމުންއަންނަ ކުންފުނި، ވަތަނިއްޔާ ޓެލެކޮމް މޯލްޑިވްސްގެ ނަން އުރީދޫއަށް ބަދަލުކޮށް ރީބްރޭންޑް ކޮށްފި އެވެ.

ރޭ ބަނޑޮހުގައި ބޭއްވި ރަސްމިއްޔާތުގައި ވަތަނިއްޔާ މޯލްޑިވްސްއަކީ އޭޝިއާގައި ބައިނަލްއަގްވާމީ ބްރޭންޑެއް ކަމަށްވާ އުރީދޫއަށް ބަދަލުވި ފުރަތަމަ ކުންފުނިކަމަށް އިއުލާން ކޮށްފަ އެވެ. ބްރޭންޑް އިފްތިތާހު ކޮށްދެއްވީ މިނިސްޓަރ އޮފް ޓްރާންސްޕޯޓް އަދި ކޮމިއުނިކޭޝަން އަމީން އިބްރާހިމާއި އުރީދޫ ގްރޫޕުގެ ސީއީއޯ ޑރ. ނާސިރު މަރާފިހު އެވެ.

ރޭގެ ރަސްމިއްޔާތުގައި އުރީދޫ ގްރޫޕް ސީއީއޯ މަރާފިހު ވިދާޅުވީ އެ ކުންފުންޏަށް ގެނައި ބަދަލާ އެކު މޯބައިލް ޓެކްނޮލޮޖީ މެދުވެރިކޮށް ދިވެހިންގެ ދިރިއުޅުމުގެ ފެންވަރު ރަނގަޅު ކުރެވޭ ވަރުގެ ފައިދާތަކެއް ހިއްސާ ކުރާނެއެވެ. އަދި އަންނަ އަހަރުގެ ތެރޭގައި ރާއްޖެއަށް މުޅިން އާ ޓެކްނޮލޮޖީތަކާ އެކު އިތުރު ހިދުމަތްތަކެއް ފެނިގެން ދާނެ ކަމަށާއި އެ ކުންފުނިން ރާއްޖޭގައި ވެސް ދޭ ހިދުމަތުގެ ފެންވަރު މިހާރަށް ވުރެ މާބޮޑަށް ރަނގަޅު ކުރާނެ ކަމުގެ ޔަގީންކަން ކަސްޓަމަރުންނަށް އޭނާ ދެއްވި އެވެ.

ރިބްރޭންޑް ކުރުމާއެކު އުރީދޫ މޯލްޑިވްސްގެ ވެބްސައިޓް ވެސް ވަނީ ތައާރަފް ކޮށްފަ އެވެ. އަދި ވެބްސައިޓް މެދުވެރިކޮށް އޮންލައިން އެކައުންޓް މެނޭޖްކުރެވޭނެ ގޮތަށް ހިދުމަތްތައް ވަނީ ބައްޓަން ކޮށްފަ އެވެ. އަދި ހިދުމަތްތައް ފުރިހަމަ ކުރުމުގެ ގޮތުން އެކްސްޕީރިއަންސް ސެންޓަރުތަކެއް ހުޅުވާނެ ކަމަށް އެކުންފުނިން ބުނެއެވެ.

އުރީދޫ އިން ރަސްމީކޮށް ރީބްރޭންޑް ކުރުން އިއުލާން ކުރީ 25 ފެބްރުއަރީ 2013 ގައި ސްޕޭންގެ ބާސެލޯނާގައި ބޭއްވި ޖީއެސްއެމްއޭ މޯބައިލް ވޯލްޑް ކޮންގްރެސްގަ އެވެ. އުރީދޫގެ ހުރިހާ ކުންފުނިތަކުން މި އައު ބްރޭންޑަށް 2013 އަދި 2014 ގެ ތެރޭގައި ބަދަލު ވެގެންދާނެ އެވެ. އުރީދޫ ބްރޭންޑަށް ވަނީ ބައިނަލްއަގްވާމީ އެތައް އެވޯޑެއް ލިބިފަ އެވެ. އެގޮތުން ދުނިޔޭގެ ކޮމިއުނިކޭޝަން އެވޯޑްސްގައި އުރީދޫއަށް ވަނީ “ބެސްޓް މޯބައިލް އޮޕަރޭޓަރ”ގެ ލަގަބު ލިބިފަ އެވެ.

އުރީދޫގެ މާނައަކީ “އަހަރެން ބޭނުން” އެވެ.