އިންތިހާބުގައި ވާދަކުރާ ކެންޑިޑޭޓުންނަށް ދުރުމީ އާދަމް ލަވަ ހަދައިދެނީ

ލޯކަލް ކައުންސިލް އިންތިހާބުގައި ވާދަކުރާ ކެނޑިޑޭޓުންނަށް ކެމްޕޭން ލަވަތައް ހަދައިދެމުން އަންނަ ކަމަށް ދުރުމީ އާދަމްބެ ބުނެފި އެވެ.

އާދަމް އިބްރާހިމް ބުނީ އިންތިހާބުގައި ވާދަކުރާ ފަރާތްތަކަށް ލަވަހަދައިދެނީ ކެނޑިޑޭޓަކީ ކޮންމެ ފިކުރެއްގެ މީހަކަށް ވިޔަސް އެ ފަރާތްތަކުގެ އެދުމުގެ މަތިން ކަމަށެވެ. މިގޮތުން ގިނަ ފަހަރަށް ލަވަ ހަދަން ބޭނުންވާ ޓްރެކް ކެނޑިޑޭޓަކު ހޮވުމަށްފަހު ލަވައިގައި ގެންނަން ބޭނުންވާ ވާހަކަތައް ހިއްސާ ކުރާ ކަމަށާއި ބައެއް ފަރާތްތަކަށް ލަވައިގައި ހިމަނާނެ ވާހަކަތައް ހާމަކުރުމުގައި ދަތިތައް ހުރުމުން ލަވަ ހެދުމުގައި އުނދަގޫ ދިމާވާކަން ފާހަގަ ކުރިއެވެ.

“އަޅުގަނޑަކަށް ނޭނގޭނެ ދެއްތޯ އެފަރާތް ތަކުގެ ހިތުގެ ވިންދާ ޝުއޫރު ތަކެއް. އެގޮތަށް އެފަރާތް ތަކުގެ އިހްސާސްތައް ހިމަނަން ބޭނުންވެ، އެ ވާހަކަތައް އަޅުގަނޑަށް ބުނެދެވިއްޖެއްޔާ ލަވައެއް ހަދާލުމަކީ އުނދަގޫ ކަމެއް ނޫން..” އާދަމް ބުންޏެވެ.

ކުރިއަށް އޮތް އިންތިހާބުގައި ވާދަކުރައްވާ 3 ކެނޑިޑޭޓަކަށް 4 ލަވައެއް މިހާތަނަށް ހަދައިދީފައިވާ ކަމަށްވެސް އާދަމް ބުންޏެވެ.

ސްކޫލު ތަކުގެ ދަރިވަރުންނަށާއި ރަސްމިއްޔާތު ތަކަށް ލަވަހަދައިދެނީ އަގެއްގައި ކަމަށް ނުވި ނަމަވެސް ކެމްޕެއިން ލަވައެއް އާދަމް ހަދައިދެނީ 1000ރ. އަށެވެ.

“ކެމްޕެއިން ލަވަ ހަދައިމިދެނީ އަގަކަށް. މިހާތަނަށް ލަވަ ހެދި ފަރާތްތަކުން އަގާމެދު ހިތްހަމަ ޖެހިފަ ތިބީ. ހަގީގަތުގަތުގައި އަޅުގަނޑަށް މަދު ވަގުތު ކޮޅަކުން ލަވަ ހެދުނަސް މިއީ ބުރަ ކަމެއް..” އާދަމް ބުންޏެވެ.

1991 ވަނަ އަހަރުން ފެށިގެން ޅެމާއި ލަވަ ހަދަމުން އަންނަ “ދުރުމި އާދަމް” މިހާތަނަށް އެކިއެކި ރަސްމިއްޔާތު ތަކަށާއި އެނޫންވެސް ކަންކަމަށް 300 އެއްހާ ލަވަޔާއި ޅެން ވަނީ ހަދާފައެވެ.