ކުޅުދުއްފުށީގައި އަޅާފައިހުރި ރޯހައުސްތަކަށް އެދި ހުށަހެޅުމުގެ ފުރުޞަތު އަންނަ މަހު ކުރީކޮޅު ހުޅުވާލެވޭނެ: ކައުންސިލް

ކުޅުދުއްފުށީގައި އަޅަމުންދާ 165 ރޯހައުސް އަށް އެދުމުގެ ފުރުސަތު މި ފެށޭ ޖެނުއަރީ މަހުގެ ކުރީކޮޅު އަލުން ހުޅުވާލެވޭނެ ކަމަށް ކުޅުދުއްފުށީ ކައުންސިލުން ބުނެފި އެވެ.

ރޯހައުސް ލިބޭނެ ފަރާތްތަކުގެ އާންމު ޝަރުތުތައް އެކުލަވާލުމުގެ މަޝްވަރާތައް ކައުންސިލާއި ހައުސިންގ މިނިސްޓްރީއާ ދެމެދު ކުރެވެމުން އަންނަ ކަމަށް ކައުންސިލުގެ ރައީސް އަލީ ހަސަން ވިދާޅުވި އެވެ.

އަލީ ހަސަން ވިދާޅުވީ މިހާރު މަޝްވަރާތައް ވަރަށް ބާރަށް ކުރިއަށް ދާ ކަމަށާއި އަންނަ އަހަރުގެ ކުރީކޮޅު ރޯހައުސަށް އެދުމުގެ ފުރުސަތު ހުޅުވާލެވޭތޯ މަސައްކަތް ކުރަމުން އަންނަ ކަމަށެވެ.

އޭނާ ވިދާޅުވީ ސަރުކާރުން ބޭނުން ވަނީ ވީހާވެސް އަވަހަކަށް ރޯހައުސަށް ބޭނުން ވެފައިވާ ރައްޔިތުންނަން އެކަން ލުއިފަސޭހަ އަދި އަވަސްކޮށް ކުރިއަށް ގެންދިއުން ކަމަށެވެ.

ހައުސިން މިނިސްޓްރީން އަނގައިގެން މީގެ ދެ އަހަރު ކުރިން ހުށަހެޅި ފޯމްތައް ކައުންސިލުން ވަނީ މިހަފުތާގައި ބާތިލު ކޮށްފަ އެވެ.

ރޯހައުސްއަށް ޑައުންޕޭމަންޓްގެ ގޮތުގައި ދައްކަން ކުރީގެ ސަރުކާރުން ކަނޑައަޅާފައިވަނީ 30000ރ. ކަމަށް ވީނަމަވެސް މިހާރުގެ ސަރުކާރުން އެ އަދަދު ވަނީ ކުޑަކޮށްފައެވެ. އެގޮތުން މިހާރު ޑައުންޕޭމަންޓްގެ ގޮތުގައި ދައްކަންޖެހޭނީ 19000ރ. އެވެ.

އަދި މީގެ އިތުރުން ކުރިން އޮތްގޮތުންނަމަ އިންސްޓޯލްމަންޓުގެ ގޮތުގައި މަހަކު ދައްކަން ޖެހެނީ 4500ރ. އެވެ. އެހެންނަމަވެސް ސަރުކާރުން އަލުން އިއުލާނުކުރަން އެންގިއިރު މަހަކަށް ދައްކަންޖެހޭ އަދަދުވެސް ވަނީ ކުޑަކޮށްފައެވެ. އެގޮތުން މިހާރު ދައްކަން ޖެހެނީ 3000ރ. އެވެ.