އައު އަހަރުގެ ފެށުން ފާހަގަ ކުރުމަށް ކުޅުދުއްފުށީގައި ޝޯވއެއް ބާއްވަނީ

އައު އަހަރުގެ ފެށުން ފާހަގަ ކުރުމުގެ ގޮތުން ކުޅުދުއްފުށީގައި މިއުޒިކް ޝޯވއެއް ބޭއްވުމަށް ތައްޔާރު ވަމުން ދާކަމަށް އެ ޝޯވ އިންތިޒާމުކުރާ ފަރާތުން ބުނެފި އެވެ.

މި ނޫހާ ވާހަކަ ދައްކަމުން ދައްސޫރަ ބޮޑުބެރު ގުރޫޕުގެ އަބްދުއްލަތީފް މުހައްމަދު ބުނީ މި ޝޯވ ގެ ކަންކަން އިންތިޒާމު ކުރަނީ “ދައްސޫރަ” އާއި “ޑީއެލްޑީ” ގުޅިގެން ކަމަށެވެ. އެހެން ނަމަވެސް 10 ގުރޫޕެއްގެ އައިޓަމްތައް މި ޝޯވގައި ފެނިގެން ދާނެ ކަމަށް އަބްދުއްލަތީފް ބުންޏެވެ.

އަބްދުއްލަތީފް ބުނީ ކުޅުދުއްފުށީގެ ބޮޑުބެރު ގުރޫޕުތަކާއި މިއުޒިކް ގުރޫޕު ތަކުގެ އެއްބާރުލުން މި ކަމުގައި ލިބެމުންދާ ކަމަށާއި ވިޔަފާރިވެރިންގެ އެހީތެރިކަންވެސް ލިބެމުންދާ ކަމަށެވެ.

އައު އަހަރު ފެށުމުގެ ގޮތުން ބާއްވާ ފުރަތަމަ ޝޯވ އޮންނާނީ މާދަމާރޭ “އާޕޮއިންޓް” ފިހާރައާ ދިމާ ހިއްކި ސަރަހައްދުގައެވެ. އަދި  މީގެ އިތުރުން ޖެނުއަރީ 1 ވަނަ ދުވަހުގެ ހަވީރު ހަތަރެއް ޖަހާއިރު ކުޑަކުދިންގެ ޝޯވ އެއް ބޭއްވުމަށް ހަމަޖެހިފައިވާ ކަމަށްވެސް އެފަރާތުން ބުނެއެވެ.