ކުޅުދުއްފުށީގައި ބެހެއްޓުމަށް ހަމަޖެހިފައިވާ އިތުރު ދެ އޭޓީއެމްގެ ބޫތު އިމާރާތް ކުރުމުގެ މަސައްކަތް ފަށައިފި

ކުޅުދުއްފުށީގައި ބެހެއްޓުމަށް ހަމަޖެހިފައިވާ އޭޓީއެމްގެ އިތުރު ދެ ބޫތެއް އިމާރާތް ކުރުމުގެ އަމަލީ މަސައްކަތް ފަށައިފި އެވެ.

ބޭންކް އޮފް މޯލްޑިވްސްގެ އޭޓީއެމްގެ އިތުރު ބޫތެއް ކުޅުދުއްފުށީގައި އިމާރާތް ކޮށްދޭނެ ފަރާތެއް ހޯދުމަށް ބީއެމްއެލް އިން ތިންވަނަ ފަހަރަށް ކުރި އިއުލާނާ ގުޅިގެން މި ކަންކުރުމަށް ޝައުގުވެރިވާ ފަރާތްތަކުގެ ތެރެއިން މި މަސައްކަތް ހަވާލުކޮށްފައިވަނީ ކުޅުދުއްފުށީ “އައިޑިއަލް ރޫފިން” އާއެވެ.

އައިޑިއަލް ރޫފިން ގެ އިސްވެރިޔާ އަހުމަދު އަލީ މިނޫހަށް މައުލޫމާތު ދެމުން ބުނީ އެފަރާތުން މި މަސައްކަތް ނަގާފައިވަނީ 3 މަސްދުވަހުގެ ތެރޭގައި ނިންމާ ބީއެމްއެލްއަށް ހަވާލުކުރާ ގޮތަށް ކަމަށެވެ. އަދި އިމާރާތް ކުރުމަށް ހަމަޖެހިފައިވަނީ އޭޓީއެމްގެ ދެ ބޫތު ޖެހިޖެހިގެން ކަމަށްވެސް އަހުމަދު އަލީ ބުންޏެވެ.

އޭޓީއެމްގެ މި ބޫތު އިމާރާތް ކުރަމުން ދަނީ ކުޅުދުއްފުށީ ރީޖަނަލް ހޮސްޕިޓަލްގެ އުތުރު ފަރާތުގައި ހުންނަ އެސްޓީއޯ ބޭސް ފިހާރަ ކައިރީގައެވެ.

ކުޅުދުއްފުށީގައި އޭޓީއެމްގެ އިތުރު ދެ ބޫތެއް ބެހެއްޓިގެން ދިޔުމުން އޭޓީއެމްގެ ޚިދުމަތް ހޯދާ ކުޅުދުއްފުށީގެ ރައްޔިތުންނަށާއި ކައިރި ރަށްތަކުގެ ރައްޔިތުންނަށް އެތައް ފަސޭހަތަކެއް ވެގެން ދާނެ އެވެ.