މިއަދު ކުރަން ޖެހިފައިވާ އެންމެ މުހިންމު ގައުމީ މަސައްކަތަކީ، އިގްތިޞާދު ނަގައި ކޮޅަށްޖެހުން: ރައީސް

މިއަދު، ދުވަހުގެ ހުރިހާ ވަގުތެއް ހޭދަކޮށްގެން ވިޔަސް ކުރަންޖެހިފައިވާ އެންމެ މުހިއްމު ގައުމީ މަސައްކަތަކީ ގައުމުގެ އިގްތިޞާދު ނަގައި ކޮޅަށް ޖެހުން ކަމަށް ރައީސުލްޖުމުހޫރިއްޔާ އަބްދުﷲ ޔާމީން ވިދާޅުވެއްޖެ އެވެ.

ރައީސުލްޖުމުހޫރިއްޔާ މިހެން ވިދާޅުވެފައިވަނީ މިއަދު ފާހަގަ ކުރަމުން އަންނަ ރާއްޖޭގެ ގައުމީ ދުވަހުގެ މުނާސަބަތުގައި ގައުމާ މުހާތަބުކުރައްވާ ދެއްކެވި ވާހަކަފުޅުގައެވެ.

ރައީސް ވިދާޅުވީ ގައުމުގެ އިގްތިޞާދު ނަގައި ކޮޅަށް ޖެހުމަކީ މިއަދު ކުރަންޖެހިފައިވާ އެންމެ މުހިއްމު މަސައްކަތްކަމަށާއި އެކަން ކުރެއްވުމުގައި ފަސްޖެހުމަކާ ނުލައި ސާބިތުކަމާއެކު ސަރުކާރުން މަސައްކަތް ކުރައްވާނެ ކަމަށެވެ. އަދި އެކަން ކުރެއްވުމުގައި ކިތައްމެ ވަރުގަދަ ސިޔާސީ ކަނޑެއްގައި ދަތުރު ކުރަންޖެހުނު ކަމުގައި ވިޔަސް އެ ދަތުރު ކުރައްވާނެ ކަމަށް ރައީސް ޔާމީން ވިދާޅުވި އެވެ.

“އަޅުގަނޑުމެން މިއަދު، ދުވަހުގެ ހުރިހާ ވަގުތެއް ހޭދަކޮށްގެންނަމަވެސް ކުރަން ޖެހިފައިވާ އެންމެ މުހިންމު ޤައުމީ މަސައްކަތަކީ، ދިވެހި އިޤްތިޞާދު ނަގައި ކޮޅަށްޖެހުން. ތަނަވަސްކަމާއި ފުދުންތެރިކަމުގެ އާ ޒަމާނަކަށް ޤައުމު ގެންގޮސް ދިނުން. އެއްބަޔަކު އަނެއްބަޔަކަށް އަޅާލާ، އޯގާތެރި މުޖުތަމަޢެއް ބިނާކުރުން. މިކަންކަން ހާސިލު ކުރުމަށް ކުރަންޖެހުނު ކޮންމެ މަސައްކަތެއް ފަސްޖެހުމަކާ ނުލައި ސާބިތުކަމާއެކު މި ސަރުކާރުން ކުރާނެ. މިއަދު ޤައުމަށް ކުރިމަތިވެފައިމިވާ ބޮޑެތި މައްސަލަތަކަށް ހައްލު ހޯދައިދީ، ރައްޔިތުންގެ އުންމީދުތައް ޙަޤީޤަތަކަށް ހެދުމުގައި އަޅުގަނޑުގެ ޢަޒުމު ގުޑުވައެއް ނުލެވޭނެ. އަދި މި މަސައްކަތް ކާމިޔާބުކުރުމަށްޓަކައި ކިތަންމެގަދަ ސިޔާސީ ކަނޑެއްގައި ދަތުރުކުރަން ޖެހުނަސް، އަޅުގަނޑާއި އަޅުގަނޑުގެ ޓީމުން، ދިވެހި ރައްޔިތުންނާއި ޤައުމަށްޓަކައި އެ ދަތުރެއްކުރާނެ.”

ރައީސްގެ ވާހަކަފުޅުގައި، ގައުމިއްޔަތު ދިރުވުމަކީ، ގައުމުގެ ތަރައްޤީގެ އެންމެ މުހިންމު އެއް ބަހާއެއްކަން ފާހަގަ ކުރައްވަމުން ވިދާޅުވެފައިވަނީ އެއީ މި ދިވެހި އުންމަތުގެ ކުރިއެރުމުގެ އަސާސްކަމަށެވެ. އަދި ގައުމިއްޔަތު ދިރުވޭނީ އެންމެ ކުޑައިރުއްސުރެ ގައުމީ ލޯބި ޒުވާނުންގެ ހިތްތަކުގައި އިތުރަށް ވަރުގަދަކޮށްގެން ކަމަށް ރައީސް ވިދާޅުވި އެވެ.

“ޤައުމިއްޔަތު ދިރުވުމަކީ، ޤައުމުގެ ތަރައްޤީގެ އެންމެ މުހިންމު އެއް ބަހާއެއްކަން. އަދި މި ދިވެހި އުންމަތުގެ ކުރިއެރުމުގެ އަސާސްކަން. ޤައުމުގެ ޙައްޤުގައި ކެރިގެން ނުކުންނާނެ ދަރިންތަކެއް އުފެއްދޭނީ، ޤައުމިއްޔަތުގެ ވަރުގަދަ ރޫޙު، އެންމެ ކުޑައިރުން ފެށިގެން ކުއްޖާގެ ހިތުގައި އަށަގަންނުވައިގެން. މިޤައުމު، މާދަމާ އެބައެއްގެ ބެލެނިވެރިކަމުގެ ދަށަށް ދާނެ ޒުވާނުންގެ ހިތްތަކުގައި މިޤައުމާމެދު ކުލުނާއި ލޯބި އިތުރަށް ވަރުގަދަކޮށްގެން.” ރައީސް ޔާމީން ވިދާޅުވި އެވެ.

ރައީސްގެ ވާހަކަފުޅުގައި ގައުމަށް ކުރިމަތިވެފައިވާ ސިޔާސީ ހަލަބޮލިކަމަށާއި، އިގްތިޞާދީ ނުތަނަވަސް ކަމަށާއި، ޒުވާނުންގެ އުދާސްތަކަށް، ފަރުވާއާއި ހައްލު ހޯދައިދިނުމަށް ސަރުކާރަށް ފުރުޞަތު ދެއްވުމަށް، ސިޔާސީ ވާދަވެރިންނަށާއި އެންމެހާ ފަރުދުންނަށް ގޮވާލައްވާފައި ވެއެވެ. އަދި ބޮޑެތި މައްސަލަތައް ހައްލުކުރުމުގައި ވެސް އަދި އިގްތިޞާދީ ދުވެލި ހަލުވި ކުރަން ކުރާ މަސައްކަތުގައި ވެސް ގައުމުގެ ސިޔާދަތަށް ބުރޫނާރާނެހެން އަދި ގައުމުގެ މިނިވަންކަމާއި އިސްތިގުލާލަށް ބުރޫނާރާނެހެން އަމަލުކުރުމަށް އެދިވަޑައިގެންނެވި އެވެ.

“ބޮޑެތި ގޮންޖެހުންތައް ޙައްލުކުރުމުގައިވެސް ޤައުމުގެ މިނިވަންކަމާއި އިސްތިޤްލާލަށް ލޮޅުމެއް އެރިޔަ ނުދީ، އިސްލާމްދީނާއި، ދިވެހި ޤައުމިއްޔަތު ޙިމާޔަތްކުރުން އެއީ، އެންމެ މުހިންމު ވާޖިބު ކަމުގައި ދެކެވަޑައިގަތުމަށް ދިވެހި ލޮބުވެތި އެންމެހައި ރައްޔިތުންނަށް އަޅުގަނޑު ގޮވާލަން.” ރައީސް ވިދާޅުވި އެވެ.

ރައީސްގެ ވާހަކަފުޅުގައި ގައުމީ ދުވަހުގެ ބަޠަލް އުތީމު ބޮޑުތަކުރުފާނު ކުރެއްވެވި ގައުމީ ޖިހާދުގެ ހަނދާން އާކުރައްވައި އެ ހާދިސާއިން މިއަދުގެ ރައްޔިތުން އިބްރަތް ހާޞިލުކުރުމަށް ގޮވާލައްވާފައި ވެއެވެ.

ރައީސްގެ ވާހަކަފުޅު ނިންމަވާލައްވަމުން ވިދާޅުވެފައިވަނީ މި ފެށުނީ އާ އަހަރެއްކަމަށާއި މިއީ ތަރައްގީއާއި ހަމަޖެހުން ގެނުވައި ގައުމިއްޔަތުގެ ރޫހު ދިރުވައި އާލާކުރުމުގެ ފުރުސަތު ފަހިވެގެންދާނެ ފަހި ދުވަސްތަކަކަށް ވެގެންދާނެ އަހަރެއްކަމަށް ވިދާޅުވި އެވެ.

“މި ފެށުނީ އާ އަހަރެއް، އާ އުންމީދުތަކެއް. އިރާދަކުރެއްވިއްޔާ ތަރައްޤީއާއި ހަމަޖެހުން ގެނެސްދޭނެ އާ ދައުރެއް. ޤައުމިއްޔަތުގެ ރޫޙު ދިރުވައި އަދި އެ ރޫޙު ދަމަހައްޓައި އާލާކުރުމުގެ ފުރުޞަތު ތަނަވަސްވެގެންދާނެ ފަހި ދުވަސްތަކެއް. މިފެށުނު އާ އަހަރުގެ ތަހުނިޔާ އެންމެހައި ދިވެހި ލޮބުވެތި ރައްޔިތުންނަށް ދަންނަވަން.”

ރައީސުލްޖުމުހޫރިއްޔާ ގައުމާ މުހާތަބުކުރައްވާ ދެއްވި މި ބަޔާނަކީ ރައީސް ޔާމީން ވެރިކަމާ ހަވާލުވެވަޑައިގެންނެވުމަށްފަހު ގައުމީ މުނާސަބަތެއްގައި ދެއްވެވި މިފަދަ ފުރަތަމަ ހިޠާބެވެ.