ބީއެމްއެލްއަށް އާ ސީއީއޯއެއް ހަމަޖައްސައިފި

ބޭންކް އޮފް މޯލްޑިވްސްގެ އާ ސީއީއޯއަކަށް މރ. އެންޑްރޫ ޖޭ ހީލީ ހަމަޖައްސައިފި އެވެ.

އެންޑްރޫއަކީ ބޭންކިންގ ދާއިރާގައި 18 އަހަރު ހޭދަކޮށްފައިވާ މީހެކެވެ. މިގޮތުން އެކި ބޭންކްތަކުގެ ސީއީއޯ ކަމާއި ބޯޑު މެންބަރުކަން އޭނާވަނީ ކޮށްފައެވެ.

ދިވެހި ބޭންކްގެ އާ ސީއީއޯ އެންޑްރޫ ވަނީ އިންޓަނޭޝަނަލް ދެ ބޭންކެއްގައި މަސައްކަތް ކޮށްފަ އެވެ. އެއީ ޑަންސްކް ބޭންކް ގްރޫޕާއި އަޔަރލޭންޑާއި ނޯދަން އަޔަރލޭންޑްގެ ރޯޔަލް ބޭންކް އޮފް ސްކޮޓްލަންޑް ގްރޫޕެވެ. އޭނާ ވަނީ ނޮރދަން އަޔަރލެންޑް ބޭންކިންގ އެސޯސިއޭޝަންގެ ޗެއަރމަންކަމާއި އަޔަރލެންޑްގެ އިންސްޓިޓިއުޓް އޮފް ބޭންކިންގެ ޕްރެޒިޑެންޓްގެ މަގާމުވެސް ފުރުއްވާފަ އެވެ.

އޭނާއަކީ ރީޓެއިލް އަދި ކޮމާޝަލް ބޭންކިންގ، ޕްރޮޖެކްޓް ފައިނޭންސިންގ، އިންޓަނޭޝަނަލް ޓްރޭޑް ފައިނޭންސިންގ، އަދި ޑިވެލޮޕްމަންޓް އެންޑް އިންވެސްޓްމަންޓް ބޭންކިންގެ ރޮނގުން ގިނަ ތަޖުރިބާތަކެއް ހޯއްދަވާފަ އެވެ.

އެންޑްރޫ ބީއެމްއެލް އާ ގުޅިވަޑައިގަންނަވާނީ މިމަހުގެ 12 ވަނަ ދުވަހު އެވެ.