އުއްމީދަކީ ކުޅުދުއްފުށީގައި ތާރު އަޅައިގެން ހަދަންޖެހޭ ހުރިހާ މަގުތަކެއް މި އަހަރުގެ ނިޔަލަށް ނިންމުން: އެމްއާރުޑީސީ

ކުޅުދުއްފުށީގައި ތާރު އަޅައިގެން ރަގަޅު ފެންވަރަކަށް ހެދުމަށް ސަރުކާރުން ނިންމާފައިވާ ހުރިހާ މަގެއް މި އަހަރު ނިމުމުގެ ކުރިން ހަދާ ނިންމާލެވޭނެ ކަމަށް އުއްމީދު ކުރާ ކަމަށް މޯލްޑިވްސް ރޯޑް ޑިވެލޮޕްމެންޓު ކޯޕަރޭޝަން (އެމްއާރުޑީސީ) އިން ބުނެފި އެވެ.

އެމްއާރުޑީސީގެ މެނޭޖިން ޑިރެކްޓަރ އިބްރާހިމް ނަޒީމް ވިދާޅުވީ މިދިޔަ އަހަރު ކުޅުދުއްފުށީ އަމީނީމަގުގެ ތާރު އެޅުމަށް ފަހު، ދެން ތާރު އެޅުމަށް ނިންމާފައިވާ ކުޅުދުއްފުށީ ބަނޑާރަމަގުގައި ކަމަށާއި އެހެންނަމަވެސް ތަފާތު އެކި ސަބަބުތަކާއި ހެދި މަގު ހެދުމުގެ އަމަލީ މަސައްކަތްތައް ނުފެށި ލަސްވި ކަމަށެވެ.

ނަޒީމް ވިދާޅުވީ މި އަހަރުގެ މަގު ހެދުމަށް ލިބިފައިވާ ބަޖެޓް ބޭނުން ކުރާނެ ގޮތަކާއި މެދު ހައުސިންގ މިނިސްޓްރީއާ މަޝްވަރާ ކުރެވެމުން އަންނަ ކަމަށާއި ބަޖެޓް ފައިނަލްވިހާ އަވަހަކަށް ސަރުކާރުން ކުޅުދުއްފުށީގައި، ރަގަޅު ފެންވަރަކަށް ތާރު އަޅައިގެން ހަދަން ނިންމާފައިވާ ހުރިހާ މަގެއްގެ މަސައްކަތް ޕްލޭނާ އެއްގޮތަށް ކުރިއަށް ގޮސް މި އަހަރު ނިމުމުގެ ކުރިން ނިންމާލެވޭތޯ މަސައްކަތް ކުރައްވާނެ ކަމަށެވެ.

އަދި މީގެ އިތުރުން ހދ ހަނިމާދޫގެ ދަންޑެހެލުމަގުގެ ތާރު އެޅުމުގެ މަސައްކަތްތައް ވެސް ބަޖެޓް ހަމަޖެހުނުހާ އަވަހަކަށް ފަށާނެ ކަމަށް ނަޒީމް ވިދާޅުވި އެވެ.

ތާރުއަޅައިގެން ރަގަޅު ފެންވަރަކަށް ހަދަން ނިންމާފައިވަނީ ކުޅުދުއްފުށީ ބަނޑާރަމަގުގެ އިތުރުން ނިކަގަސްމަގާއި މަގާމްމަގެވެ.