ކެންޑިޑޭޓުންގެ ފޯރަމްގައި ބައިވެރިނުވީ ފޯރަމަށްވުރެ މުހިއްމު ކަންތައް ހުރީމަ: ކެމްޕޭން މެނޭޖަރ

ކުޅުދުއްފުށީ ޒުވާނުން އިސްނަގައިގެން ރޭ ބޭއްވި ކެންޑިޑޭޓުންގެ ފޯރަމްގައި ބައިވެރިނުވީ އެފޯރަމަށް ވުރެ މުހިއްމު އެހެން ކަންތައްތައް މިވަގުތު ހުރީމަކަމަށް އަމިއްލަ ގޮތުން ކައުންސިލަށް ވާދަކުރައްވާ 5 ކެންޑިޑޭޓުންގެ ކެމްޕެއިން މެނޭޖަރު އަލީ އިބުރާހިމް ވިދާޅުވެއްޖެ އެވެ.

އަމިއްލަ ގޮތުން ކުރިމަތިލައިފައިވާ ކެންޑިޑޭޓުންގެ ކެމްޕެއިން ކުރިއަށްދާގޮތާ ބެހޭގޮތުން އިއްޔެ ސުފުރާމަތީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަލީ ވިދާޅުވީ ފޯރަމަކީ މުހިއްމު ކަމެއް ކަމަށާއި އެހެންނަމަވެސް މިވަގުތު ފޯރަމަށް ވުރެ މުހިއްމު އެހެން ކަންތައްތައް ހުރިކަމަށެވެ.

“ފޯރަމަކީ މުހިއްމު އެއްޗެއް. އެހެންނަމަވެސް ފޯރަމަށް ވުރެ މުހިއްމު ކަންތައް މިވަގުތު އެބަހުރި. ފޯރަމުގައި ބައިވެރިވެގެން އެހޭދަކުރާ ވަގުތުގަ އަޅުގަނޑުމެންނަން ލިބޭ ޕަބްލިސިޓީއަށް ވުރެ މުހިއްމު އެހެން ކަންތައްތަކެއް އަޅުގަނޑުމެންނަށް އެބަހުރި. މިސާލަކަށް ފައިނަލް ވޯޓާސް ލިސްޓު ޗެކް ކުރުން ފަދަ މުހިއްމު އެތައް ކަމެއް އެބަހުރި.” ކައުންސިލް އިދާރާގެ ސީނިއަރ ޕްރޮޖެކްޓް އޮފިސަރުގެ މަގާމު ވެސް ފުރުވަމުން ގެންދަވާ އަލީ ވިދާޅުވި އެވެ.

5 ކެންޑިޑޭޓުންގެ ކެމްޕެއިން މެނޭޖަރ އަލީ ވިދާޅުވީ އެހެން ބަޔަކު ކުރާ ކަމަކަށް ވުރެ މުހިއްމު ވާނީ މިވަގުތު ކެމްޕެއިންގެ މަސައްކަތްތައް ކަމަށާއި އެބޭފުޅުންގެ ކެމްޕެއިން ޕްލޭނާ އެއްގޮތަށް ކުރިއަށްދާ ކަމަށެވެ. އަދި މިހާރުވެސް އިދާރީ ގޮތުންނާއި ގާނޫނީ ގޮތުން އަދި ރައްޔިތުންގެ ސަޕޯޓް ހޯދުމަށް ގިނަ ކަންތައް ތަކެއް ކުރިއަށް ރޭވިފައިވާ ކަމަށް އޭނާ ވިދާޅުވި އެވެ.