ނޮޅިވަރަންފަރަށް ބަދަލުވި ފަރާތްތަކުގެ ތެރެއިން ގެ ލިބިފައި ނުވާ އާއިލާތަކަށް ޖޫން މަހު ތެރޭގައި ގެތައް ހަވާލު ކުރެވޭނެ: ކައުންސިލް

ސަރުކާރުގެ އެއްފަސް ކުރުމުގެ ސިޔާސަތުގެ ތެރެއިން 2011 ވަނަ އަހަރު ހދ. ނޮޅިވަރަންފަރަށް ދިރިއުޅުން ބަދަލު ކޮށްފައިވާ އެ އަތޮޅު ފަރިދޫ، މާވައިދޫ އަދި ކުނބުރުދޫގެ ރައްޔިތުންގެ ތެރެއިން ގޯތި ލިބިފައިނުވާ އާއިލާތަކަށް ޖޫން މަހުގެ ތެރޭގައި ގޯތި ހަވާލުކުރެވޭ ވަރު ވާނެ ކަމަށް ނޮޅިވަރަންފަރު ކައުންސިލުގެ ރައީސް ވިދާޅުވެއްޖެ އެވެ.

ނޮޅިވަރަންފަރުގައި ގެތައް އެޅުމުގެ މަސައްކަތް ކުރައްމުން އަންނަ ނޫމަޑި ކޮންސްޓްޝަނާއި ހަވާލާ ދެއްވާ އިބްރާހިމް ވިދާޅުވީ ގެތަކުގެ މަސައްކަތް ވަރަށް ބާރަށް ކުރިއަށްދާ ކަމަށާއި މަސައްކަތް ހުއްޓުމެއް ނެތި ކުރިއަށްދާ ނަމަ އެ ރަށަށް ދިރިއުޅުން ބަދަލު ކޮށްފައިވާ އާއިލާ ތަކުގެ ތެރެއިން މިހާރު ގޯތި ލިބިފައި ނުވާ 52 އާއިލާއަށް ގެތަށް ނިންމާ ޖޫން މަހުގެ ތެރޭގައި އެ ފަރާތަކަށް ތަޅުދަނޑި ހަވާލު ކުރެވޭނެ ކަމަށެވެ.

ނޮޅިވަރަންފަރަށް 2011 ވަނަ އަހަރު ދިރިއުޅުން ބަދަލު ކުރި ފަރިދޫ އާއި ކުނބުރުދޫ އަދި މާވައިދޫގެ ރައްޔިތުންގެ ތެރެއިން ސަރުކާރުން އިމާރާތް ކޮށްދެއްވި 181 ގޯތީ ގައި މިހާރު ވެސް މީހުން ދިރިއުޅެމުންދެ އެވެ.