ވައްކަންކުރަން ފުނަދުއަށް އެރިބަޔަކު ހައްޔަރުކޮށްފި

ވައްކަންކުރަން ށ. ފުނަދުއަށް އެރި 6 މީހަކު ފުނަދޫ އިން ހައްޔަރު ކޮށްފި އެވެ.

މި މައްސަލާގައި ހައްޔަރުކޮށްފައި ވަނީ 19 އަހަރުގެ ދެ މީހަކާއި 22 އަހަރުގެ މީހަކާއި 21 އަހަރުގެ މީހަކާއި 24 އަހަރުގެ މީހެއްގެ އިތުރުން 17 އަހަރުގެ ކުއްޖެކެވެ.

ވައްކަން ކުރުމަށްޓަކައި އެމީހުން ފުނަދުއަށް އައި ދޯނި ވެސް ވަނީ ފުލުހުންގެ ބެލުމުގެ ދަށުގައެވެ.

މި މީހުން ހައްޔަރުކޮށްފައި ވަނީ ފުލުހުންނަށް ލިބުނު މައުލޫމާތަކާ ގުޅިގެން މި މީހުން ހޯދަމުންދަނިކޮށް މި މީހުންނަށް ފުލުހުން ފެނުމާއެކު ފިލާފައިވަނިކޮށެވެ. އެގޮތުން 17 އަހަރުގެ ކުއްޖާ ފިޔަވައި ދެން ތިބި ހުރިހާ މީހުންވެސް ހައްޔަރުކޮށްފައި ވަނީ ފުލުހުންނަށް ފިލައިގެން އުޅެނިކޮށް ހުކުރު ދުވަހުގެ ރޭ ދަންވަރު އެކި ވަގުތުތަކުގައި ފުނަދޫންނެވެ. އަދި 17 އަހަރުގެ ކުއްޖާ ހައްޔަރުކުރީ ފުލުހުންނަށް ފިލައިގެން އުޅެނިކޮށް ހޮނިހިރު ދުވަހު 08:45 ހާއިރު އެވެ.

މިމީހުން ހައްޔަރު ކުރުމުގެ އިތުރުން އެމީހުން ވަގަށް ނަގާފައިވާކަމަށް ބެލެވޭ ގިނަ ޢަދަދެއްގެ އިލެކްޓްރޯނިކް ސާމާނުތަކެއް ހުރި ދެ ބަރޯއެއް ވަނީ ފުލުހުން ހޯދާފައެވެ.

މި މައްސަލަ ށ. ފުނަދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.