މި އަހަރުގެ ދިރާސީ އައު އަހަރު ފެށުނުއިރު ހުރިހާ ކަމެއްހެން ހުރީ ފުރިހަމައަށް: ކުޅުދުއްފުށީގެ ސްކޫލުތައް

ދިރާސީ އައު އަހަރުގެ ކިޔެވުން ފެށުނުއިރު ކުޅުދުއްފުށީގެ ސްކޫލުތަކުގައި ދަތިތަކެއް ނެތި، ވަސީލަތައް “ބަރާބަރަށް” ލިބިފައިވާ ކަމަށް ސްކޫލު ތަކުން ބުނެފި އެވެ.

ކުޅުދުއްފުށީގައި ހުރި އެންމެ ދުވަސްވީ އެއް ސްކޫލުކަމަށްވާ ހދ. އަތޮޅު ތައުލީމީ މަރުކަޒު ވަގުތީ ގޮތުން ހިންގުމާ ހަވާލުވެ ހުންނެވި އެ ސްކޫލުގެ ޑެޕިއުޓީ ޕްރިންސިޕަލް އިބްރާހިމް ރަޝީދު ވިދާޅުވީ މި އަހަރުގެ ދިރާސީ އައު އަހަރަށް ސްކޫލުގެ ކިޔެވުން ފެށުނުއިރު އެ ސްކޫލަށް ބޭނުންވާ ހުރިހާ ވަސީލަތްތަކެއް ލިބިފައިވާ ކަމަށެވެ.

އޭނާ ވިދާޅުވީ ޓީޗަރުންގެ ދަތިކަމެއް ވެސް ނެތް ކަމަށާއި އަދި ފަރުނީޗަރގެ ދަތިކަމެއް ވެސް ނެތް ކަމަށެވެ. 705 ދަރިވަރުން މިއަހަރު ތައުލީމް ހާސިލު ކުރަމުންދާ މި ސްކޫލުގެ ޖާގައިގެ ދަތިކަން މި ވަގުތަށް ނެތް ނަމަވެސް ސްކޫލުގެ އާބާދީ އިތުރުވަމުންދާއިރު ޖާގާއިގެ ދަތިކަން އަންނަ އަހަރު ކުރިމަތި ވާނެ ކަމަށެވެ.

މި އަހަރު އެ ސްކޫލަށް 119 އަށްވުރެ ގިނަ ދަރިވަރުން އަލަށް ވަދެފައިވާ އިރު ކުރިން މީޓިން ރޫމެއްގެ ގޮތުގައި ބޭނުންކުރި ރޫމް މި އަހަރު ކުލާސް ރޫމަކަށް ވަނީ ބަދަލު ކޮށްފައެވެ. ޖާގައިގެ ދަތިކަން ހައްލު ކުރުމަށްޓައި މިދިޔަ އަހަރު މިނިސްޓްރީގައި 2 ކުލާސް ރޫމަކަށް އެދިފައިވާނޭ ކަމަށް އެ ސްކޫލުން މައުލޫމާތު ދެއެވެ.

ކުޅުދުއްފުށީގައި ގްރޭޑް ދިހައަކާ ހަމައަށް ކިޔަވައިދެމުން އަންނަ އަފީފުއްދީން ސްކޫލުން ވެސް ބުނީ މި އަހަރުގެ ދިރާސީ އައު އަހަރުގެ ކިޔެވުން ފެށުނުއިރު ދަތިތަކެއް ކުރިމަތިވެފައި ނުވާ ކަމަށާއި ޓީޗަރުން ވެސް ހަމަވެފައިވާ ކަމަށެވެ.

ގުރުއާން ޓީޗަރަކާއި ޕްރައިމަރީ ގުރޭޑަށް ކިޔަވައި ދެއްވާ ޓީޗަރެއް ސްކޫލު ކިޔެވުން ފެށުނުއިރު ނެތް ނަމަވެސް އިއްޔެ އިން ފެށިގެން އެ ޓީޗަރުންގެ ހިދުމަތް ވެސް ލިބިފައިވާ ކަމަށް އަފީފުއްދީން ސްކޫލު ޕްރިންސިޕަލް އާދަމް މޫސާ ވިދާޅުވި އެވެ.

އަދި ޖާގައިގެން ދަތިކަން ސްކޫލަށް ކޮންމެވެސް ވަރަކަށް މި އަހަރުވެސް ކުރިމަތިވެފައިވާ ކަމަށާއި އެގޮތުން މީޓިން ރޫމު ކުލާހަކަށް ބަދަލު ކޮށްފައިވާ ކަމަށް އާދަމް މޫސާ ވިދާޅުވި އެވެ.އޭނާ ވިދާޅުވީ އިތުރުގަޑީގެ ފައިސާއާ މެދު ޓީޗަރުންގެ ހިތްހަމަނުޖެހުން ތަކެއް އެބަހުރި ކަމަށެވެ.

އަފީފުއްދީން ސްކޫލުގައި 520 ދަރިވަރުން މި އަހަރު ތައުލީމު ހާސިލުކުރަމުން ދެއެވެ.

ޖަލާލުއްދީން ސްކޫލުގެ ޑެޕިއުޓީ ޕްރިންސިޕަލް އަލީ އިސްމާއިލް ވިދާޅުވީ މި އަހަރުގެ ދިރާސީ އައު އަހަރުގެ ކިޔެވުން ފެށުނު އިރު އެއްވެސް ދައްޗެއް ނެތް ކަމަށާއި ހުރިހާ ހިދުމަތްތަކެއް ވެސް ބަރާބަރަށް ހުރި ކަމަށެވެ. ޖަލާލުއްދީން ސްކޫލަކީ ސާނަވީ އަދި މަތީ ސާނަވީ އަށް ކިޔަވައިދޭ ސްކޫލެކެވެ. މިއަހަރު 490 ދަރިވަރަކު އަންނަނީ އެ ސްކޫލުގައި ތައުލީމް ހާސިލު ކުރަމުންނެވެ.

ކުޅުދުއްފުށީގެ ސްކޫލުތައް މިދިޔަ އަހަރު އެއް ދަންފަޅިއަށް ބަދަލު ކުރުމާއި ގުޅިގެން ޖާގައިގެ ދަތިތައް އަންނަނީ ކުރިމަތި ވަމުންނެވެ.