ކުޅުދުއްފުށީގެ ކްލަބް ޖަމިއްޔާތަކާ އަޕަރ ނޯތް ޕޮލިސް ޑިވިޒަނުގެ ކޮމާޑަރ ބައްދަލުކުރައްވައިފި

ކުޅުދުއްފުށީގެ ކްލަބް ޖަމިއްޔާތަކުގެ އިސް ފަރާތްތަކާ އަޕަރ ނޯތް ޕޮލިސް ޑިވިޒަންގެ ކޮމާންޑަރ ޗީފް އިންސްޕެކްޓަރ އޮފް ޕޮލިސް ފަތުހުﷲ ވަހީދު ބައްދަލުކުރައްވައިފި އެވެ.

ކުޅުދުއްފުށީ ޕޮލިސް ސްޓޭޝަނުގައި ކުރިއަށް ދިޔަ މި ބައްދަލުވުން ބާއްވާފައިވަނީ މިދިޔަ ހޯމަ ދުވަހުގެ ރޭ އެވެ.

ފުލުހުން މައުލޫމާތު ދޭ ގޮތުގައި މި ބައްދަލުވުމަކީ މި އަހަރުގެ ފެބްރުއަރީ މަހުގެ ތެރޭގައި ހދ އަތޮޅަށް ހުޅުވާލައިގެން ވޮލީ ބޯޅަ މުބާރާތެއް ބޭއްވުމަށް ކުޅުދުއްފުށީ ކްލަބުތަކާ މަޝްވަރާ ކޮށްލުމަށްޓަކައި ބޭއްވި ބައްދަލުވުމެއް ކަމަށެވެ.

މި ބައްދަލުވުމުގައި ޑިވިޒަންގެ ކޮމާންޑަރ ދެއްކެވި ވާހަކަފުޅުގައި މި މުބާރާތް ބޮޑަށް އަމާޒު ކުރެވެނީ އަންހެން ބޭފުޅުންނަށްކަން ފާހަގަ ކުރައްވަމުން ކޮމާންޑަރ ވިދާޅުވީ މިހާރުވެސް ބައެއް ޓީމުތަކުން އެކުވެރިކަމުގެ މެޗުތައް ކުޅެމުންދާ ކަމަށެވެ.

ވޮލީ މުބާރާތެއް ބޭއްވުމަށް ފުލުހުން ނިންމާފައިވާއިރު މީގެ ދުވަސްކޮޅެއް ކުރިން ހދ. ހަނިމާދޫގައާއި ނޮޅިވަރަމްގައި ވޮލީ ކޭމްޕެއް ކުރިއަށް ގެންގޮސްފައިވާކަން ފާހަގަ ކޮށްލެވެއެވެ. މިހާރު މި ކޭމްޕް ކުރިއަށް ދަނީ ކުޅުދުއްފުށީގައެވެ.

މި ބައްދަލުވުމުގައި އަޕަރ ނޯތް ޕޮލިސް ޑިވިޒަންގެ ކޮމާންޑަރު ޗީފް އިންސްޕެކްޓަރ އޮފް ޕޮލިސް ފަތުހުﷲ ވަހީދުގެ އިތުރުން ހދ. އަތޮޅު ކޮމާންޑަރ ސަބް އިންސްޕެކްޓަރ އޮފް ޕޮލިސް އިބްރާހިމް މުހައްމަދު އާއި ކުޅުދުއްފުށީ ޒިގްޒެގް ޖަމިއްޔާ އާއި ބޭލާ ޖަމްޢިއްޔާގެ އިތުރުން ޓީމް ކޮރަލް ގެ މަންދޫބުން ބައިވެރިވެފައިވާ ކަމަށް ފުލުހުން މައުލޫމާތު ދެއެވެ.

ކުޅުދުއްފުށީގައި މީގެ ކުރިންވެސް ފުލުހުންގެ އެހީތެރިކަމާއެކު މި ފަދަ މުބާރާތްތަކެއް ބާއްވާފައި ވެއެވެ.