ޑިގްރީ ފެންވަރުގެ ހަތަރު ކޯހަކާއި އިތުރު 8 ކޯހެއް ޔުނިވަރސިޓީގެ ކުޅުދުއްފުށީ ކެމްޕަހުގައި އަލަށް ފަށައިފި

ޑިގްރީ ފެންވަރަށް ކިޔަވައިދޭ ހަތަރު ކޯހަކާއި އިތުރު 8 ކޯހެއް މި އަހަރު އަލަށް ގައުމީ ޔުނިވަރސިޓީގެ ކުޅުދުއްފުށީ ކެމްޕަހުގައި ކިޔަވައިދޭ ފަށައިފި އެވެ.

ކުޅުދުއްފުށީ ކެމްޕަހުގެ މެނޭޖަރު ކަމުގެ މަގާމާ މި އަހަރު ހަވާލުވެލެއްވި އިބްރާހިމް މުހައްމަދު ވިދާޅުވީ މި އަހަރު ވެސް ބައެއް ކޯސް ތަކަށް އެކަށީގެންވާ އަދަދަށް ކުދިން ނުލިބުމުގެ ސަބަބުން ނުފެށިވާ ކަމަށެވެ. އަދި ބައެއް ފަހަރު ކޯސްތަކަށް ކުދިން ނެގުމަށް ފަހު ތަފާތު ސަބަބުތަކާއި ހެދި ބައެއް ކޯސްތަކަށް ދޫކޮށްލާ ކަމަށާއި ބައެއް ދާއިރާތަކުގެ ކޯސްތަކަށް ކުދިންގެ ޝައުގުވެރިކަމެއް ނޯންނަ ކަމަށެވެ.

މި އަހަރު އަލަށް ފެށުނު ޑިގްރީ ކޯސް ތަކަކީ ދިވެހި ބަހުގެ ޑިގްރީ ކޯހަކާއި އިސްލާމިކް ސްޓަޑީޒްގެ ޑިގްރީ ކޯހެއްގެ އިތުރުން ޕުރައިމަރީ ޓީޗިންގ ޑިގްރީ ކޯހަކާއި އަދި ޓޫރިޒަމް މެނޭޖްމެންޓުގެ ޑިގްރީ ކޯހެކެވެ.

މިއަހަރު އަލަށް ކުޅުދުއްފުށީ ކެމްޕަހުގައި ކިޔަވައިދޭ ފެށި އިތުރު ކޯސްތަކަކީ ޑިޕޮލޮމާއިން ނާސިންގ، އެޑްވާންސް ސެޓްފިކެޓް އިން ހިއުމަން ރިސޯސް މެނޭޖްމެންޓް، އިންގްލިޝް ފޯ ފަދަރ ސްޓަޑީޒް އާއި ޑިޕޮލޮމާ އިން އާލީ ޗައިލްޑްހޫޑްގެ ފައުންޑޭޝަން އެވެ.

ކުޅުދުއްފުށީ ކެމްޕަހުގައި މި އަހަރު ފެށީ ސެޓްފިކެޓް ލެވެލްގެ 4 ކޯހެކެވެ. އެއީ ވެލްޑިން އެންޑް މެޓަލް ޝީޓާއި އިންޖިން ރިޕެއަރ އެންޑް މެއިންޓަނަންސް ކޯހަކާއި ފްރޮންޓް އޮފީސް އޮޕަރޭޝަނުގެ ކޯހެއްގެ އިތުރުން ހައުސް ކީޕިންގ އޮޕަރޭޝަނުގެ ކޯހެކެވެ.

ކުޅުދުއްފުށީ ކެމްޕަހުގެ މެނޭޖަރ ވިދާޅުވީ ކުދިން ޝައުގުވެރިކުރުމަށް އެ ފަރާތުން ތަފާތު މަސައްކަތްތައް ކުރާ ކަމަށާއި އެގޮތުން ސްކޫލު ނިންމާ ދަރިވަރުންނާއި އެދަރިވަރުންގެ ބެލެނިވެރިނަން ކެމްޕަހުން ލިބެ ހުރި ކޯސްތަކާއި ބެހޭ މައުލޫމާތު ދޭ ކަމަށެވެ.

މިއަހަރު އަލަށް ފެށި މި ކޯސްތަކާއި ގުޅިގެން މިހާރު ކުޅުދުއްފުށީ ކިޔަވައިދޭ ޑިގުރީ ކޯސް ތަކުގެ އަދަދު 9 އަކަށް ވަނީ އިތުރުވެފަ އެވެ.