ކުޅުދުއްފުށީ ފިހާރައަކުން ވަގަށް ނަގާފައިވާ ތަކެތި ހޯދައި ދެ މީހަކު ހައްޔަރުކޮށްފި

ކުޅުދުއްފުށީ “ދުއްލިސާ” ފިހާރައިން ވަގަށް ނަގާފައިވާ ތަކެތި ހޯދައި އެ މައްސަލައާ ގުޅުންހުރި ދެ މީހަކު ހައްޔަރުކޮށްފި އެވެ.

ފުލުހުން ބުނީ ވައްކަމުގެ މައްސަލައިގައި ހައްޔަރުކޮށްފައިވަނީ އުމުރުން 22 އަހަރުގެ މީހަކާއި އުމުރުން 23 އަހަރުގެ މީހެއް ކަމަށެވެ. އެހެންނަމަވެސް އެ މީހުންނާ ބެހޭ އިތުރު މައުލޫމާތެއް ފުލުހުން އާންމުކޮށްފައެއް ނުވެއެވެ.

ފުލުހުން މައުލޫމާތު ދޭ ގޮތުގައި މި ދެމީހުން ހައްޔަރުކޮށްފައިވަނީ މިދިޔަ މަހުގެ 29 ވަނަ ދުވަހުގެ ހަވީރު “ދުއްލިސާ” ފިހާރައިން ވައްކަންކޮށްފައިވާ ކަމަށް ހުށަހެޅުނު މައްސަލައާ ގުޅިގެން ފުލުހުން ކުރިއަށް ގެންދާ ތަހުގީގަށް ލިބުނު މައުލޫމާތަކާ ގުޅިގެން ކޯޓު އަމުރެއްގެ ދަށުން ކަމަށެވެ.

“ދުއްލިސާ” ފިހާރައިން ވަގަށް ނަގާފައިވާ 4168ރ. އާއި 50ރ. ގެ އުރީދޫ އަދި ދިރާގުގެ 23 ކާޑުގެ ޖުމްލަ އަގު 1150ރ. ގެ ކާޑު ފެނިފައިވަނީ ކުޅުދުއްފުށީ ފަޅުގެއެއްގެ ތެރެއިންނާއި މި މައްސަލައިގައި ހައްޔަރުކުރި އުމުރުން 22 އަހަރުގެ މީހާ ދިރިއުޅޭ ގެއިން ކަމަށް ފުލުހުން ބުންޏެވެ.

ފުލުހުން ބުނެފައިވާ ގޮތުގައި ހައްޔަރުކުރި ދެ މީހުންގެ ތެރޭގައި ހިމެނޭ 22 އަހަރުގެ ޒުވާނަކީ މީގެކުރިންވެސް މަސްތުވާތަކެތި، ވައްކަން އަދި ފޭރުމުގެ މައްސަލަތަކުގެ ގިނަ ރެކޯޑް އޮންނަ މީހެކެވެ.