ރޯޒޭ މަޖިލީހުގެ ކުޅުދުއްފުށީ އުތުރު ދާއިރާގެ ގޮނޑިއަށް ވާދަކުރައްވަނީ

“ރޯޒޭ” އޭ ބުނުމުން ކުޅުދުއްފުށީގެ ގިނަ ބަޔަކަށް އެއީ ކޮން ބޭފުޅެއްކަން ވަރަށް ރަގަޅަށް އެނގޭނެ އެވެ. ވަކިން ހާއްސަކޮށް ތައުލީމީ ދާއިރާގެ ބޭފުޅުންނަށާއި ކުޅިވަރު ކުޅޭ ޒުވާނުންނަށް ރޯޒޭ ވަރަށް ރަނގަޅަށް އެނގޭނެ އެވެ.

ކުޅުދުއްފުއްޓަކީ ވެސް ތައުލީމީ ގާބިލު ޒުވާނުން ތިބި ރަށެކެވެ. ނަމަވެސް ސިޔާސީ ދާއިރާގައި ފާހަގަކޮށްލެވޭފަދަ މަގާމުތަކުގައި ކުޅުދުއްފުށީގެ ޒުވާނުން ވަރަށް މަދެވެ. ހާއްސަކޮށް ސިޔާސީ ދާއިރާއާ ގުޅިގެން ކުޅުދުއްފުށީގެ ގިނަ ޒުވާނުން މަސައްކަތް ކުރާކަށް ބޭނުމެއް ނުވެއެވެ. އެހެން ނަމަވެސް އަހުމަދު އަބުދުﷲ (ރޯޒޭ) ގަބޫލު ކުރައްވަނީ، ރަށަށް ތަރައްގީ މިއަދު ގެނެވޭނީ ސިޔާސީ ދާއިރާއަށް ނިކުންނަވައިގެން ކަމަށެވެ.

ރޯޒޭ އަކީ ކުރިއަށް އޮތް ރައްޔިތުން މަޖިލީހުގައި އަމިއްލަ ގޮތުން ކުޅުދުއްފުށީ އުތުރު ދާއިރާއަށް ވާދަ ކުރައްވަން ނިންމާފައިވާ ސިޔާސީ ދާއިރާއަށް މުޅިން އައު މޫނެކެވެ. ސިޔާސީ ދާއިރާއަށް ކިތައްމެ އައު ނަމަވެސް އޭނާ އަކީ ތައުލީމު ދިނުމުގެ ދާއިރާއިން ކިޔަވައިގެން ހުރި ތައުލީމީ ޒުވާނެކެވެ.

ރޯޒޭ ވިދާޅުވީ ކޮންމެ ސަރުކާރަކުން ވެސް ގިނަ ވައުދު ތަކެއް ވާކަމަށާއި އެހެންނަމަވެސް ރަށް ތަރައްގީ ނުވަނީ އެ ވައުދުތައް ރަށަށް ނައުމުގެ ސަބަބުން ކަމަށެވެ. ސިޔާސީ ދާއިރާ ނިކުތުމަށް ވިސްނެވީ ސަރުކާރުން ވެފައިވާ ވައުދުތައް ރަށަށް ގެނެސް ރަށް ތަރައްޤީ ކުރުމުގެ މަގުޞަދުގައި ކަމަށް އަހުމަދު އަބްދުﷲ ވިދާޅުވި އެވެ. ތައުލީމީ ދާއިރާއިން ފުރަތަމަ ޑިގްރީ ހާސިލު ކޮށްފައިވާ ރޯޒޭ ދެކޭގޮތުގައި ރަށަށް ފުރިހަމަ ތަރައްގީ ގެނެވޭނީ ރަށަށް އުފަން ރަށު ލޯބި ޖެހިފައި ހުރި މީހަކަށެވެ.

ހދ. އަތޮޅު ތައުލީމީ މަރުކަޒުގެ ކޮލިފައިޑް ލީޑިން ޗީޓަރެއްގެ މަގާމު ފުރުއްވި އަހުމަދު އަބުދުﷲ ވިދާޅުވީ ރައްޔިތުންގެ މަޖިލީހުގެ ގޮނޑި ކާމިޔާބު ކުރެއްވިއްޖެ ނަމަ އެންމެ އިސްކަމެއް ދޭނީ ތައުލީމީ ދާއިރާ އަށާއި ސިއްހީ ދާއިރާ ކުރި އެރުވުމަށް ކަމަށެވެ. އޭނާ ވިދާޅުވި ގޮތުގައި ތައުލީމީ ދާއިރާ އިން “ކޮލިޓީ” މީހުން ތައްޔާރުކޮށް އެދާއިރާ އިން ގާބިލު މީހުން އުފެއްދުމަކީ އޭނާގެ އަމާޒެއް ކަމަށެވެ. އަދި ސަރުކާރާއި ގުޅިގެން ކުޅުދުއްފުށީ ހޮސްޕިޓަލުގެ ފެންވަރު ރަގަޅު ކުރުމަށް ސަރުކާރަށް ބާރު އަޅާނެ ކަމަށް ރޯޒޭ ވިދާޅުވި އެވެ.

އަހުމަދު އަބުދުﷲ (ރޯޒޭ) އަކީ ކުޅުދުއްފުށީގެ އަމިއްލަ ޖަމިއްޔާ އެއް ކަމަށްވާ ޒިގްޒެގު ފޯ ޔޫތު ލިންކޭޖުގެ މި ދައުރުގެ ޗެއާންމަން ވެސް މެއެވެ.

އަހުމަދު އަބްދުﷲގެ އިތުރުން ކުޅުދުއްފުށީ އުތުރު ދާއިރާއަށް ދެން ވާދަކުރައްވަނީ ނަޞްރުﷲ އިސްމާއީލާއި އަބްދުލްގަފޫރު މޫސާއެވެ. ނަޞްރުﷲ އަކީ ހދ އަތޮޅު ކައުންސިލްގެ މެމްބަރެކެވެ. ގަފޫރަކީ ރައްޔިތުންގެ މަޖިލީހުގެ އެ ދާއިރާގެ މިހާރުގެ ވެސް މެމްބަރެވެ.