ވައްކަމުގެ މައްސަލައެއްގައި ހައްޔަރުކުރި ޒުވާނަކަށް ފުލުހުން އަނިޔާކޮށްފައިވާ ކަމަށް އޭނާގެ އާއިލާއިން ބުނެފި

ރޯމާ ބުރޭންޑްގެ ބައިސްކަލެއް ވަގަށް ނެގި ކަމުގެ ތުހުމަތުގައި މި މަހުގެ 2 ވަނަ ދުވަހު ހައްޔަރު ކުރި 18 އަހަރުގެ ޒުވާނަކަށް ފުލުހުން އަނިޔާ ކޮށްފައިވާ ކަމަށް އޭނާގެ އާއިލާއިން ބުނެފި އެވެ.

ބައިސްކަލެއް ވަގަށް ނެގި ކަމުގެ ތުހުމަތުގައި ކޯޓު އަމުރެއްގެ ދަށުން ހައްޔަރުކޮށް ފުލުހުން އަނިޔާ ކުރި ކަމަށް ބުނާ ޒުވާނާ އަކީ ކުޅުދުއްފުށީ، މަހިނޫރުގެ، ނަޒީރު މުހައްމަދެވެ.

މި ނޫހަށް މައުލޫމާތު ދެމުން އޭނާގެ އާއިލާގެ މެމްބަރަކު ބުނީ ކުނިކޮށި ކައިރީގައި ބަހައްޓާފައި ހުރި ބައިސްކަލެއް ވަގަށް ނެގި ކަމުގެ ތުހުމަތު ގައި މި މަހު 2 ވަނަ ދުވަހު ފުލުހުން ނަޒީރު ހައްޔަރު ކޮށްފައިވަނީ އޭނާ މިހާރު ދިރިއުޅެމުންދާ ގެއިން ކަމަށާއި ހައްޔަރު ކުރުމަށް ފަހު ކުށަށް އެއްބަސް ކުރުވަން ވެގެން ކުޅުދުއްފުށީ ޕޮލިސް ޓޭޝަނުގައި މަސައްކަތް ކުރާ ފުލުހެއް އޭނާގެ އަތުގައި ބިޑި އަޅުވާފައި “ކުރޮސް” ކުރުމަށް ފަހު ބުރަކަށީގައި ކަކޫ ޖައްސާ އިތި ކުރި ކަމަށެވެ.

ހައްޔަރުކޮށްފައި ހުރިއިރު އަނިޔާކޮށްފައިވާ ކަމަށް ބުނާ ނަޒީރު މުހައްމަދު މި ނޫހާ ވާހަކަ ދައްކަމުން ބުނީ ބިޑި އަޅުވާފައި އިތި ކުރުމަށް ފަހު އޭނާގެ ބޮލުގެ އިސްތަށިގަނޑުގައި ހިފާ ފަހަތަށް ކުއްލިއެއް ޖެހި ކަމަށާއި އެވަގުތު ލަގޮނޑި ވަޅަށް ވަރަށް ތަދުވި ކަމަށެވެ.

ކަކުލުން ބުރަކަށީގައި ޖެއްސި ތަނަން ވެސް އަދިވެސް ތަދުވާ ކަމަށް ނަޒީރު ބުންޏެވެ. އަނިޔާ ކުރީ އެންމެ ފުލުހެއް ކަމަށާއި އެހެން ފުލުހުން އޭނައާ ދޭތެރޭ އަމަލު ކޮށްފައިވަނީ ރަގަޅަށް ކަމަށް ވެސް އޭނާ ބުންޏެވެ. އަދި އޭގެ އިތުރުން މޫނާ ކައިރިއަށް ގާނގަޑަކަށް 2 ތިން އިންޗި ދުރުމިނުން ސްޕުރޭ ޖެހި ކަމަށް އޭނާ މައުލޫމާތު ދެ އެވެ.

މިކަމާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ އަނިޔާ ކޮށްފައިވާ ނަމަ އެކަމެއް ކަމާ ބެހޭ އިދާރާތަކަށް ހުށަހަޅައިގެން ބެލުމުގެ ފުރުސަތު ކޮންމެ މީހަކަށް ވެސް އޮންނާނެ ކަމަށާއި އެކަހަލަ ކަމެއް ހިނގާފައިވާ ނަމަ އެ މައްސަލައެއް ކަމާ ބެހޭ ފަރާތަކަށް ހުށަހަޅައިގެން ކުރިއަށް ދިއުމަކީ ފުލުހުންގެ އިދާރާއިން ވަރަށް ބޮޑަށް ތާއީދު ކުރާ ކަމެއް ކަމަށެވެ.

ޕެޕަރ ސްޕްރޭ ކައިރިން ޖެހުމުގެ ސަބަބުން ލޮލަށް އެއްވެސް ގެއްލުމެއް ލިބިފައިވޭތޯ އާއި ބުރަކައްޓާއި އަދި އެހެން އެއްވެސް ތަނަކަށް ގެއްލުމެއް ވެފައިވޭ ތޯ ބެލުމަށްޓައި ކުޅުދުއްފުށީ ރީޖަނަލް ހޮސްޕިޓަލުގައި ހެދި ޓެސްޓުތަކުން ނަޒީރުއަށް އެއްވެސް ގެއްލުމެއް ލިބިފައިނުވާ ކަމަށް އޭނާ ބެލި ޑޮކްޓަރ މައުލޫމާތު ދެއެވެ.