ބީ.އެމް.އެލްގެ މެނޭޖިންގ ޑިރެކްޓަރަކަށް އެންޑްރޫ ހީލީ ހަމަޖައްސައިފި

ބޭންކް އޮފް މޯލްޑިވްސްގެ މެނޭޖިން ޑިރެކްޓަރުގެ މަގާމަށް އަޔަރލެންޑްގެ އެންޑްރޫ ޖޭ. ހީލީ އިސްކުރައްވައިފި އެވެ.

ބީއެމްއެލްގެ އެމްޑީ އަދި ސީއީއޯ މިދިޔަ އަހަރުގެ ފަހުކޮޅު އިސްތިއުފާ ދެއްވާފައި ވާތީ އެންޑްރޫ އެ މަގާމަށް ހަމަޖެއްސީ ފެބްރުއަރީ 10 ވަނަ ދުވަހު ބޭއްވުނު ބީ.އެމް.އެލްގެ ޑިރެކްޓަރުން ބޯޑުގެ 533 ވަނަ ޖަލްސާގަ އެވެ.

އެންޑްރޫ ވަނީ ފައިނޭންޝަލް ސާވިސަސްގެ ރޮނގުން ޑިގްރީއަކާއި ފަސްޓް ކުލާސް އޮނާރސްއާއެކު ބިޒްނަސް ދާއިރާއިން މާސްޓާރސް ޑިގްރީ ހާސިލްކުރުމުގެ އިތުރުން ބޭންކިންގގެ ދާއިރާއިން ތަފާތު ސަނަދުތައް ހާސިލު ކުރައްވާފަ އެވެ. އަދި ބޭންކިންގ ސިނާއަތުގެ ސީއީއޯ އަދި ބޯޑް ލެވެލްގައި 18 އަހަރުގެ ތަޖުރިބާ ހޯއްދަވާފައިވެ އެވެ. މިގޮތުން އަޔަރލޭންޑް އަދި އިނގިރޭސިވިލާތުގެ ބައިނަލްއަގުވާމީ ދެ ބޭންކްއެއްގައި އެންޑްރޫ މަސައްކަތް ކުރައްވާފައިވެ އެވެ. އެއީ ޑަންސްކް ބޭންކިންގ ގުރޫޕުގެ ސްކެންޑިނޭވިއަން އިންސްޓިޓިއުޝަންގެ ސީއީއޯ އަދި އެގްޒެކަޓިވް ކޮމިޓީގެ މެންބަރުކަމެވެ. މީގެ އިތުރުން އަޔަރލޭންޑް އިންސްޓްޓިއުޓް އޮފް ބޭންކިންގެ ރައީސްކަމާއި ނޮދަން އަޔަރލޭންޑް ބޭންކިންގ އެސޯސިއޭޝަންގެ ޗެއާރމަންކަންވެސް އެންޑްރޫ ކުރައްވާފައިވެ އެވެ.

ރޯޔަލް ބޭންކް އޮފް ސްކޮޓްލޭންޑް ގުރޫޕުގެ ގިނަ އިސްމަގާމުތަކެއް ފުރުއްވާފައިވުމާއެކު އެންޑްރޫއަކީ އިނގިރޭސިވިލާތުގެ ޗާޓާރޑް އިންސްޓިޓިއުޓް އޮފް ޕާސަނަލް ޑިވޮލޮޕްމެންޓްގެ މެންބަރެއްވެސް މެއެވެ. ރީޓެއިލް އަދި ކޮމާޝަލް ބޭންކިންގ، ޕްރޮޖެކްޓް ފައިނޭންސިންގ، އިންޓަނޭޝަނަލް ޓްރޭޑް ފައިނޭންސިންގ އަދި ޑިވޮލޮޕްމެންޓް އެންޑް އިންވެސްޓްމެންޓް ބޭންކިންގގެ ދާއިރާއިން ގިނަ ތަޖުރިބާތަކެއްވެސް އެންޑްރޫ ވަނީ ހާސިލުކުރައްވާފަ އެވެ.

ބޭންކް އޮފް މޯލްޑިވްސް އާ އެންޑްރޫ ގުޅިވަޑައިގަތީ ޗީފް އެގްޒެކުޓިވް އޮފިސަރެއްގެ ހައިސިއްޔަތުން 12 ޖެނުއަރީ 2014 ގައެވެ. އަދި ސަރުކާރުން 6 ފެބުރުއަރީ 2014 ގައި ބޭންކްގެ ބޯޑަށް އެންޑްރޫ ވަނީ އައްޔަންކުރައްވާފަ އެވެ.

ބީ.އެމް.އެލްއަކީ ދިވެހިރާއްޖޭގެ އެންމެ ބޮޑު ބޭންކިންގ ނެޓްވޯކް އެވެ. މިގޮތުން 235000 ކަސްޓަމަރުންނަށް އެ ބޭންކުން ހިދުމަތްދެ އެވެ.