އަފީފުއްދީން ސްކޫލުން އެއް ދަރިވަރު ނެޝެނަލް ޓޮޕްޓެންއަށް އެރިއިރު ޖުމްލަކޮށް ދަށް ނަތީޖާތަކެއް

އަފީފުއްދީން ސްކޫލްގެ ފަރާތުން ޖީސީ އޯލެވެލް އިމްތިހާނުގައި ބައިވެރިވި ފުރަތަމަ އަހަރު އެ ސްކޫލުގެ ދަރިވަރަކު ނެޝެނަލް ޓޮޕްޓެންއަށް އަރައިފި އެވެ.

އެސްކޫލުން ޓޮޕްޓެންއަށް އަރާފައި ވަނީ އެ ސްކޫލުގެ ކެޕްޓަން ކުރަމުންއައި މުޙައްމަދު އަރުޝަމް އަބްދުއްރަޝީދެވެ. އޭނާވަނީ 3 އޭ ސްޓާރ، 3 އޭ، 1 ބީ އަދި 1 ސީ ހޯދާފައެވެ. ޓޮޕްޓެންގައި އޭނާ ހިމެނިފައިވަނީ 5 ވަނައިގަ އެވެ.

އަފީފުއްދީން ސްކޫލުގެ އެއް ދަރިވަރެއް ޓޮޕްޓެންގައި ހިމެނުން ކަމުގައި ވިޔަސް ސާނަވީ އިމްތިހާނުގައި އެސްކޫލުން ނެރެފައިވަނީ ދަށް ނަތީޖާތަކެކެވެ. ސްކޫލްގެ އެހެން އެއްވެސް ދަރިވަރަކަށް އޭ ސްޓާރއެއް ލިބިފައި ނުވާއިރު އޭ ފާހެއް ލިބިފައި ވަނީ ވެސް އެންމެ ދަރިވަރަކަށެވެ.

ބިޒްނަސް ސްޓްރީމްގެ މާއްދާތައް ކަމަށްވާ ބިޒްނަސް ސްޓަޑީޒް، އެކޮނޮމިކްސް އަދި އެކައުންޓްސް އިން ވެސް އެއްވެސް ދަރިވަރަކަށް އޭ ފާހެއް ލިބިފައެއް ނުވެއެވެ. ބީ އަދި ސީ ފާސް ލިބިފައިވަނީ ވަރަށް މަދު ދަރިވަރަކަށެވެ. ވުމާއެކު ފާސްވި އިންސައްތަ އުޅެނީ ވަރަށް ދަށުގައެވެ. މިގޮތުން ހަމައެކަނި އެކޮނޮމިކްސް އިން ފާސްވެފައިވަނީ ވެސް 7.7 އިންސައްތަ އެވެ.

އެޗްއެސްސީ އިމްތިހާނުގައި 28 ދަރިވަރުން އިސްލާމުން ފާސްވިއިރު 26 ދަރިވަރުންވަނީ ދިވެހިން ފާސްވެފަ އެވެ.

6 ދަރިވަރުންނަށް ދިވެހިން އަދި 5 ދަރިވަރުންނަށް އިސްލާމުން ބީ ފާސް ލިބިފައިވެ އެވެ. އިމްތިހާނުގައި ބައިވެރިވި ދަރިވަރުންގެ ދެބައި ކުޅަ އެއްބައި ދަރިވަރުން ވަނީ ދިވެހިން ސީ ފާސް ހޯދައިގެން ފާސްވި އިންސައްތަ 60.5 އަކަށް އަރުވާފަ އެވެ. އިސްލާމުން ފާސްވީ 64.3 އިންސައްތަ އެވެ.

އަފީފުއްދީން ސްކޫލަކީ ގްރޭޑް 10-1 ކިޔަވައިދޭ ސްކޫލެކެވެ. މިދިޔަ އަހަރުގެ ޖީސީއީ އޯލެވެލް އިމްތިހާނުގައި އެސްކޫލުން 43 ދަރިވަރުން ބައިވެރިވި އެވެ.

މި ސްކޫލުގައި މި އަހަރު 520 ދަރިވަރުން ތައުލީމު ހާސިލްކުރެއެވެ.

ނޯޓް: ސްކޫލުން ދީފައިވާ މައުލޫމާތުގައި ކުށެއް ހުރުމުގެ ސަބަބުން އިސްލާހު ކުރެވިފައި.